Փաստ ինֆո

Լուրջ եք ասո՞ւմ: Հիմա քննություն է գնում: Այդ երիտասարդը անցել է բոլոր սահմանները և օրենքի առաջ պետք է պատասխան տա: Այս մասին ԱԺ-ում լրագրողների հետ զրույցում ասաց ՔՊ-ական պատգամավոր Հակոբ Ասլանյանը՝ անդրադառնալով նախօրեին տրանսպոտում իր մասնակցությամբ տեղի ունեցած միջադեպին։

Հիշեցնենք՝ երեկ հանրային տրանսպորտում միջադեպ է տեղի ունեցել Հակոբ Ասլանյանի և ակտիվիստ Սամվել Վարդանյանի մասնակցությամբ, որն ուղեկցվել է փոխադարձ հայհոյանքներով։ Տեսանյութում լսվում է, որ պատգամավորին երիտասարդն անվանել է հակահայ։ Միաժամանակ քաղաքացին պնդել է, որ պատգամավորն իրեն հարվածել է։

Միջադեպի առնչությամբ քրեական գործ է հարուցվել, պատգամավորին վիրավորած երիտասարդը ձերբակալվել է:

Ասլանյանը ասաց, որ հրապարակաված տեսանյութում երևում է, թե իրականում ինչ է եղել. «Ես բարձրանում եմ, որ գնամ վճարեմ, իջնեմ, ինքն իմ ճանապարհը փակում է և սկսում է այնպիսի բառեր արտաբերել, որ էլ ասելու չի: Ես իրեն նորից ասում եմ՝ ճանապարհ տուր՝ իջնեմ, բայց նա չի թողնում, այդ ժամանակ ես հրում եմ իրեն ու անցնում եմ: Այդքան բան: Դրան տրվելու է իրավական գնահատական»:

Դիտարկմանը, թե երբ Ալեն Սիմոնյանը թքել էր քաղաքացու վրա՝ դա ներկայացվեց որպես էմոցիոնալ պոռթկում, ինչո՞ւ այս դեպքում էլ այդպես չի որակվում, Հակոբ Ասլանյանը պատասխանեց. «Դա էմոցիոնալ պոռթկում չէ, դա հստակ կանխամտածված մոտեցում է: Դրանք տարբեր դաշտեր են: Ես հանգիստ ինձ համար նստած եմ, գալիս եմ, որ իջնեմ, ինքն իմ դեմը փակում է և սկսում է վիրավորել: Իր փաստաբաններն ասում են՝ մենք դեմոկրատական երկրում ենք ապրում: Բայց դեմոկրատիայի դեպքում ձեր իրավունքն ավարտվում է այնտեղ, որտեղ սկսվում է իմ իրավունքը: Չի կարելի ասել՝ ես դրա իրավունքն ունեմ, բա ես ինչի՞ իրավունքն ունեմ:

Երկրորդ, եթե անգամ նա խոսքի իրավունք ուներ, նկարահանելու իրավունք չուներ, նկարահանել, նշանակում է մտնել իմ սեփական տարածքը: Ասում են՝ ամբողջ Եվրոպայում էլ պապարացիները նկարում են, ես էլ ասացի՝ դրա համար իրենց գլուխը ջարդում են: Այո, թող խոսեր, թող ինչ-որ բան ասեր, բայց ինքը նկարում էր»:

Դիտարկմանը, թե սովորական քաղաքացի չեք, պետք է հանդուրժող լինեք՝ նա պատասխանեց, որ ինքը հանդուրժող է։

Աղբյուր` Փաստինֆո