Փաստ ինֆո

Փաշինյանի «նանոհեղափոխությունը» գլխներիս պայթեց, հիմա մի հատ էլ մեգախնդիր կպայթի, եթե 50-100 հազար ներգաղթյալ գա Հայաստան։ Այս մասին խորհրդարանական ճեպազրույցների ընթացքում ասաց «Հայաստան» խմբակցության պատգամավոր Արթուր Խաչատրյանը՝ մեկնաբանելով Times պարբերականում հրապարակված հոդվածի տեղեկությունները։ Ըստ պարբերականի, Մեծ Բրիտանիան բանակցություններ է սկսել Հայաստանի, Կոտ դ՛Իվուարի, Կոստա Ռիկայի և Բոտսվանայի հետ՝ Ռուանդայի միգրանտների արտաքսման սխեման կրկնօրինակելու համար։

«Ապօրինի փախստականների հարցը Մեծ Բրիտանիայի համար կենսական նշանակություն ունեցող խնդիր է և պատահականությամբ, թե ինչպես՝ ես եղել եմ իրենց վարչապետի և ընդդիմության հարցուպատասխանին, որտեղ հենց այդ հարցն է քննարկվել։ Նշանակում է, որ Հայաստանն ինչ-որ հնարավոր բարեհաճ վերաբերմունքի համար տարբեր տեսակի ճնշումների տակ է։ Դա նշանակում է, որ ապօրինի միգրանտները գալու են լցվեն Հայաստան, եթե այդ ապօրինի միգրանտները տնտեսական, քաղաքական կամ ինչ-որ արժեքով օգտակարություն ներկայացնեին Մեծ Բրիտանիայի համար, այնտեղ կուղարկեին։ Հիմա իրենք չեն կարողանում նրան հետ ուղարկել իրենց երկրներ, ուղարկելու են այլ երկրներ։ Հիմա այդ ապօրինի միգրանտների հոսքը որտեղից է ավելի շատ տեղի ունեցել՝ Աֆղանստան, Պակիստան, Հնդկաստան, արաբական երկրներ, աֆրիկյան երկրներ»,- ասաց Խաչատրյանը՝ մտահոգություն հայտնելով, որ ՀՀ-ում ցածր ծնելիության և մեծ արտագաղթի պայմաններում, անհասկանալի հիմքերի հիման վրա Բանդլադեշից, Հնդկաստանից, Պակիստանից եկած անհասկանալի գործարքի արդյունքում 50-100 հազար մարդ գա, ինչ է լինելու ՀՀ-ն՝ 20 տարի հետո։

«Դա ռիսկային խնդիր է և Հայաստանը փորձում է օրիգինալ լինել։ Փորձում էր չէ Փաշինյանն օրիգինալ լիներ Մյունխենում՝ միկրոհեղափոխություններ, նանոհեղափոխություններ, մեգոհեղափոխություններ, մինիհեղափոխություններ, գլխներիս պայթեց։ Հիմա էլ մի մեգախնդիր էլ գլխներիս պայթելու է»,- ասաց պատգամավորը։

Աղբյուր` Փաստինֆո