Փաստ ինֆո

Պետք է լինի ընդհանուր գործընթաց, ոչ թե՝ պարզապես միակողմանի զիջում՝ ինչ-որ ակնկալիքներով։ Հիմա հարց ենք տալիս՝ այդ տարածքները որ հիմքով եք ճանաչում ադրբեջանական, ասեք որն է հիմքը, որն է քարեզը՝ սկսենք բանակցել, բայց չկա որևէ հիմք, չկա պայմանավորվածություն՝ քարտեզների մասով, բայց Հայաստանը, մասնավորապես՝ Նիկոլ Փաշինյանն ու Ալիևը, շարունակաբար պնդում են, որ այդ տարածքները պատկանում են Ադրբեջանին, ո՞ր քարտեզով։ Այս մասին խորհրդարանական ճեպազրույցների ժամանակ հայտարարեց «Հայաստան» խմբակցության պատգամավոր Աննա Գրիգորյանը։

«Հիմա, եթե ասում եք՝ տարածքները տալիս ենք, այլ տարածքներ՝ մեր օկուպացված տարածքներից չենք ստանում, տարածքները տալիս ենք՝ խաղաղություն չենք ստանում, տարածքները տալիս ենք՝ պատերազմ չենք կանխում, բա սա ի՞նչ է, եթե ոչ միակողմանի զիջում։ Մեր առաջարկը հետևյալն է՝ պետք է համապարփակ գործընթաց լինի, պետք է հիմքերը, քարտեզները հստակեցնենք, հետո՝ խոսենք բանակցությունների, քննարկումների մասին։ Առանց հստակեցումների տարածքների զիջումը՝ բերելու է նոր անվտանգային ռիսկերի՝ ՀՀ-ի համար»,-արձանագրեց Աննա Գրիգորյանը՝ հիշեցնելով, որ միջպետական ճանապարհ է զիջվում, գազատարի նկատմամբ հսկողությունն է ՀՀ-ն կորցնում։

Պատգամավորը զուգահեռներ անցկացրեց Սյունիքի հետ՝ նշելով, որ Սյունիքում տարածքներ զիջվեցին, զորքը, որը կանգնած էր, Փաշինյանի հրամանով հետ քաշվեց, ասացին՝ կանգնում ենք մեր սահմանների վրա, որից հետո ադրբեջանական հարձակումը կկանխենք, արդյունքում՝ ադրբեջանցիները եկան, ամրացան, հետո՝ դա որպես պլատֆորմ օգտագործելով հարձակում գործեցին։

«Հիմա նույնը Տավուշու՞մ ենք ուզում անել, որտեղ ամենապաշտպանված դիրքերն են։ Այսինքն՝ ամենալավ ստրատեգիական նշանակության դիրքերը զիջենք Ադրբեջանին, որ այնտեղ կանգնի և նորից հարվածեն Հայաստանին։ Այսինքն՝ մենք Հայաստանը դնում ենք զոհասեղանին, ինչի համար»,- ընդգծեց Գրիգորյանը։

Աղբյուր` Փաստինֆո