Փաստ ինֆո

Սահմանազատման գործընթացում հայկական իշխանությունը չպետք է տարբեր գյուղեր հայտարարի որպես ադրբեջանական և նոր միայն դրանից հետո սկսի խոսել դելիմիտացիայից, դեմարկացիայից։ Այս մասին խորհրդարանական ճեպազրույցների ընթացքում ասաց «Պատիվ ունեմ» խմբակցության քարտուղար Տիգրան Աբրահամյանը։

Նա ընդգծեց, որ այս պրոցեսները կարող են երկար տևել, բայց իշխանությունն իր քայլերով լեգիտիմացնում է ադրբեջանական հնարավոր ագրեսիան՝ Հայաստանի Հանրապետության նկատմամբ։ «Դեմարկացիան բանակցություններ է, եթե դելիմիտիացիան իրավական հիմքերի, քարտեզների ամրագրումներն են, ապա դեմարկացիան հողի վրա աշխատանքն է, որը ենթադրում է բանակցություններ։ Դասական առումով կողմերը բանակցում են, որ եթե որևէ հատվածում կան հողեր, որ տեղի գյուղի համար անհրաժեշտություն են, ապա այդ կենսական անհրաժեշտության տարածքը տրվում է այդ պետությանը, մեկ այլ հատվածից էլ այդքան հող տրվում է մյուս պետությանը։ Հիմա, երբ իշխանությանն ասում ես՝ ինչո՞ւ ես գնում ամենավատ ճանապարհով՝ ասում է, որովհետևր կռիվ կլինի, ապա բանակին է թիրախավորում։ 6 տարի է դուք եք իշխանության, սա 2018, 19, 20 թթ-ները չի, որ ինչ-որ բաներ սրա նրա վզին փաթաթեք։

Մի իշխանություն, որ 6 տարի է արդեն երկիր է ղեկավարում ու ասում է, որ եթե Ադրբեջանը հարձակվի՝ բանակն իր խնդիրը չի կարող լուծել, ապա դա պարզ գնահատականն է այդ իշխանության անվտանգության ուղղությամբ իրականացված քաղաքակականության և վառ տապալումների, ինչից այս իշխանությունն այդքան նյարդայնանում է»։

Նա նաև ընդգծեց, որ իշխանության տարբեր ներկայացուցիչներ նյարդային ջղաձգումներ են ունենում հատկապես փաստարկված խոսքի դեպքում, երբ կեղծիքները մատնացույց են արվում։ «Սա նրանից է, որ իրենք տեսնում են, որ հանրությանը, կամ հանրության մեծ մասին չեն կարողանում համոզել, թե ինչ են այդպես վարվում դրա համար էլ պարբերաբար փորձում են ինչ-որ մեկի վզին իրենց ձախողումները փաթաթել, ընդդիմության, Ռուսաստանի, բայց դա էլ արդեն չի ստացվում ու գնում են մասսայական ձերբակալությունների, ինչն արդեն իրականացվում է»։

Աղբյուր` Փաստինֆո