Փաստ ինֆո

«Freedom House»-ի զեկույցում գրեթե չկա մի բան, որը մենք արձանագրած չլինենք։ Այս մասին «Փաստինֆո»-ի հետ զրույցում ասաց «Իրազեկ քաղաքացիների միավորում» ՀԿ համակարգող Դանիել Իոաննիսյանը՝ անդրադառնալով Freedom House միջազգային իրավապաշտպան կազմակերպության զեկույցին։

Հիշեցնենք, որ միջազգային իրավապաշտպան կազմակերպությունն արձանագրել է Հայաստանում ժողովրդավարական կառավարման ազգային վարկանիշի անկում։ Կազմակերպությունն անդրադարձել է նաև իրավապահ համակարգին՝ նշելով, որ դատախազությունը՝ իշխող կուսակցության հետ համերաշխ է։ Հեղինակավոր կազմակերպությունն անդրադարձել է նաեւ դատական համակարգում նկատվող խնդիրներին, ֆիքսել Կարեն Անդրեասյանի քպական լինելու հանգամանքը։

«Բարձրագույն դատական խորհրդի նախագահ, «Քաղաքացիական պայմանագրի» անդամ Կարեն Անդրեասյանի պաշտոնավարումն ուղեկցվել է մի քանի դատավորների նշանակման ու ազատման վիճահարույց որոշումներով։ Առանձնահատուկ մտահոգություններ կան, թե կարգապահական ինչ միջոցներ են ձեռնարկվում այն դատավորների նկատմամբ, որոնք վիճարկում են Բարձրագույն դատական խորհրդի անկախությունը, կամ՝ փոխկապակցված են նախկին ռեժիմի հետ, մինչդեռ կասկածելի անցյալ ունեցող, բայց իշխանության հետ համերաշխ դատավորներն առաջխաղացում են ստանում», նշում է Freedom House-ը՝ որպես օրինակ բերելով Կոռուպցիայի կանխարգելման հանձնաժողովի քննությամբ բացասական գնահատական ստացած և քաղաքական բանտարկության որոշումներ կայացրած Մնացական Մարտիրոսյանի նշանակումը Երևանի ընդհանուր իրավասության քրեական դատարանի նախագահի պաշտոնում։

«Կարեն Անդրեասյանի՝ նախկին կուսակցական լինելու, նախկին նախարար լինելու հանգամանքը քննարկվել է քաղհասարակության, այդ թվում՝ «ԻՔՄ» կողմից՝ դեռ 1,5 տարի առաջ։ Դատախազության և իշխանության միջև, ըստ էության, համերաշխ լինելն էլ շատ ակնհայտ է։ Ալեն Սիմոնյանի նկատմամբ հետապնդում չիրականացնելը, մի շարք ընտրական վեճերով քրեական հետապնդում չիրականացնելը, այդ ամենը դրա դրսևորումն է։ Այդ ամենի մասին թե՛ ԻՔՄ-ն, թե՛ այլ քաղաքացիական հասարակական կազմակերպություններ բազմիցս խոսել ենք, որևէ նոր բան, չեմ կարծում, որ կա»,- ասաց Դանիել Իոաննիսյանը։

Սակայն, Իոաննիսյանը համամիտ չէ, որ կոռուպցիայի դեմ պայքարը վատթարանում է, այդուհանդերձ, բազմաթիվ խնդիրներ մեր զրուցակիցն արձանագրեց և նշեց, որ առաջիկայում պատրաստվում են բարձրացնել այդ հարցերը, օրինակ՝ գնումների ոլորտում կոռուպցիոն հանցագործությունների հարցը, որն այժմ ուսումնասիրվում է և լուրջ խնդիրներ կան։

Իսկ թե կազմակերպության զեկույցն ինչ ազդակ կարող է լինել իշխանությունների համար, ինչ քայլեր պետք է իրականացվեն՝ իրավիճակի կարգավորման համար, Իոաննիսյանը նշեց, որ զեկույցում շատ մանրամասն նշված է, ինչը հեշտացնում է լուծումների վերաբերյալ հարցի փնտրտուքը, երկար մտածել պետք չէ, պետք է կարդալ զեկույցը, որտեղ գրված է մանր և մեծ խնդիրները, միջոցներ ձեռնարկվեն, որ այդ խնդիրնբերը չկրկնվեն կամ եթե շարունակական են, ապա դադարեն։

Հարցին՝ արդյո՞ք իշխանությունները կամք ունեն, օրինակ, ՔՊ-ական պատգամավոր Արթուր Հովհաննիսյանը նշել է, թե «Հայաստանը ժողովրդավար է, թե՝ չէ, «Freedom House»-ը չի որոշում, Դանիել Իոաննիսյանը պատասխանեց․ «Դե թող Արթուր Հովհաննիսյանը որոշի։ Թող նրան նշանակենք ՝ Հայաստանի ժողովրդավարության մակարդակի չափող։ Նման պաշտոն հնարենք և Արթուր Հովհաննիսյանին նշանակենք այդ պաշտոնին»։

Այդուհանդերձ, մեր զրուցակիցը նշեց, որ այդ զեկույցները պատշաճ քննարկման առարկա դառնում են, այդ թվում՝ հիմնականում ԱԽ-ի կողմից, բայց իրեն անձամբ չի բավարարում այն տեմպը, մակարդակը, որոշ դեպքերում, օրինակ՝ ոստիկանության բարեփոխումների դեպքում, այն ուղղությունը, որով փոփոխությունները տեղի են ունենում։

Հեղինակ՝ Իզաբել Սահակյան

Աղբյուր` Փաստինֆո