Փաստ ինֆո

Իսկ ով է որոշել, որ սահմանն անցնում է այն հատվածում, որը նկարագրված է պաշտոնական հաղորդագրության մեջ։ Արդյո՞ք ՀՀ-ի և Ադրբեջանի միջև տեղի է ունեցել սահմանների սահմանանշում և սահմանագծում, որի հետևանքով այսօր ունենք իրավիճակ, երբ պաշտոնական հաղորդագրույունում արդեն գնահատական է տրվում, թե որ մասով է անցնում սահմանը։ Միայն այս հանգամանքը ցույց է տալիս իրավիճակի ողջ աբսուրդությունը։ Այս մասին լրագրողների հետ զրույցում ասաց «Պատիվ ունեմ» խմբակցության պատգամավոր Տիգրան Աբրահամյանը՝ անդրադառնալով ՀՀ ԱԱԾ տարածած հաղորդագրությանը։

«Զորքերը, այս դեպքում՝ ԱԱԾ սահմանապահ զորքերը չեն կանգնում միմյանց դիմաց։ Այսինքն՝ մի հատվածով պետք է անցնի սահմանագիծ, իսկ կողմերը կանգնում են որոշակի հեռավորության վրա, մի գիծ չէ, որտեղ գալիս ու կանգնում են զորքերը։ Այս իրավիճակում, երբ հատկապես այս օրերին ակտիվ քննարկվում է Հայաստանի և Ադրբեջանի միջև դելիմիտացիայի և դեմարկացիայի հարցը, արդեն իսկ խնդիր է »,- նշեց Աբրահամյանը՝ նկատելով, որ այսպիսի հաղորդագրությունները բավականին լուրջ և վատ ազդեցություն են ունենում ԶՈՒ-երի վրա և այն ստորաբաժանումների ու ծառայությունների վրա, որոնք զբաղված են սահմանագծի պաշտպանությամբ և պահպանությամբ։

«Այն, որ իշխանությունը, այս դեպքում՝ ԱԱԾ-ն փորձում է անել հաղորդագրություններ, հայտարարություններ, որոնք, ըստ իրենց, չի լարում իրավիճակը, ապա նախորդ անգամ՝ Ներքին Հանդի պարագայում, եղավ նման հայտարարություն, բայց դա Ադրբեջանին չխանգարեց ծանր հարվածներ հասցնելու և հայկական կողմին զոհեր պատճառելու առումով»,- նշեց նա։

Հիշեցնենք, որ ապրիլի 10-ին Հայաստան-Ադրբեջան պետական սահմանի Ներքին Խնձորեսկ հատվածում միջադեպ է տեղի ունեցել: Հայաստանի Հանրապետության քաղաքացի հանդիսացող հովիվը մոլորված հոտին փնտրելիս հայտնվել է Ադրբեջանի տարածքում: Ադրբեջանական կողմը վերադարձրել է մոլորված հոտը: Հովիվը նույնպես գտնվում է ՀՀ տարածքում: Այսօր ՀՀ ԱԱԾ-ն հաղորդագրություն է տարածել՝ հայտնելով, որ միջադեպի առթիվ իրականացված ծառայողական քննության արդյունքում պարզվել է, որ ՀՀ ԱԱԾ ՍԶ N զորամասի պարտադիր ժամկետային զինծառայող, նշված հատվածում սահմանապահ ծառայություն իրականացնող վերակարգի ավագ Յ.Ք-ն, տեղեկանալով հովվի և նրա հոտի կողմից մոլորվելու հետևանքով Ադրբեջանի տարածքում հայտնվելու և հովվի կողմից Հայաստանի տարածք վերադառնալու հանգամանքի մասին, վերջինիս և վերակարգի մեջ գտնվող սահմանապահ ծառայողների հետ փորձել են հատել ՀՀ պետական սահմանը և վերադարձնել հոտը՝ այդ կերպ խախտելով սահմանապահ ծառայություն կրելու կանոնները, որն անզգուշությամբ պատճառել է էական վնաս, այն է՝ նշված սահմանապահ հատվածում սկսվել է անհարկի հրաձգություն, ակնհայտ վտանգի է ենթարկվել մարդկանց կյանքն ու առողջությունը, նկարագրված գործողություններն առաջացրել են պետության անվտանգության համար սպառնալիք, ինչպես նաև պետական սահմանի նշված հատվածում պատշաճ հսկողության բացակայության վիճակ: Միջադեպի արդյունքում վիրավորում է ստացել Ադրբեջանի պետական սահմանապահ ծառայության զինծառայող: ՀՀ ԱԱԾ-ն ափսոսանք է հայտնել այդ առնչությամբ և հայտնել քրեական վարույթի նախաձեռնման մասին։

Աղբյուր` Փաստինֆո