Փաստ ինֆո

Զինծառայողներին մատուցվող սննդատեսակների որակը և քանակը մշտապես գտնվում է համապատասխան պաշտոնատար անձանց վերահսկողության տակ։ Այս մասին «Փաստինֆո»-ի հետ զրույցում ասաց ՊՆ մամուլի քարտուղար Արամ Թորոսյանը՝ անդրադառնալով աղմկահարույց տեսանյութին։

Հիշեցնենք, որ երեկ հասարակական մի քանի գործիչներ, այդ թվում՝ «Դոգ» մականունով հայտնի Վարդան Ղուկասյանի ՝ «ԴՕԿ» կուսակցության անդամներ տեսանյութ էին տարածել առ այն, որ ստուգումներ են իրականացրել՝ զինծառայողների սննդի որակի վերաբերյալ՝ պնդելով, որ այն անորակ է, ավելին, պահածոները ոչ թե մսից են, այլ՝ ճարպից, ինչից հրաժարվում է անգամ շունը։

Ընդ որում, սա այն դեպքում, երբ իշխանությունները բազմիցս «թմբկահարել են», թե բարեփոխումների արդյունքում լուծվել է զինծառայողների սննդի հարցը, ավելին՝ շատերը կհիշեն, որ բանակում արդեն «ելակ» կա։ Մինչդեռ, տեսանյութերից մեկով էլ երևում է, որ անգամ շունը չի կարողանում ուտել պահածոները։

«Փաստինֆո»-ն զինծառայողների սննդի որակի շուրջ մտահոգությունների առնչությամբ դիմել է ՀՀ ՊՆ-ին, որտեղից վստահեցրել են՝ զինծառայողներին մատուցվում է բարձրորակ սնունդ։

«Անհեթեթություններին, առավել եւս՝ վատ բեմադրված ներկայացումներին պաշտպանության նախարարությունը չի արձագանքում։ Այդուհանդերձ, քանի որ լրագրողական հարցում է, նշեմ, որ զինծառայողներին մատուցվում է բարձրակարգ սնունդ և դա կփաստեն ոչ միայն բոլոր զինծառայողները, այլ նրանց հազարավոր ընտանիքներ, ինչպես նաև հասարակության բազմաթիվ ներկայացուցիչներ, ովքեր այս կամ այն առիթով ճաշել են զորամասերում և մարտական հենակետերում։ Իսկ պահածոյացված սննդատեսակները սառը վիճակում օգտագործելը նախընտրելի չէ, օգտագործելուց առաջ պետք է ենթարկվեն ջերմային մշակման, այլ կերպ ասած անհրաժեշտ է տաքացնել այն»,- նշեց ՊՆ մամուլի քարտուղար Արամ Թորոսյանը՝ հավելելով, որ անձնակազմի շրջանում ժամանակ առ ժամանակ իրականացվում են հարցումներ՝ սննդատեսակների նախընտրելիության վերաբերյալ, ինչպես նաև պարբերաբար իրականացվում են սննդի որակի լաբորատոր հետազոտություններ․ «Սննդատեսակների որակը և քանակը մշտապես գտնվում է համապատասխան պաշտոնատար անձանց վերահսկողության տակ»։

Հեղինակ՝ Իզաբել Սահակյան

Աղբյուր` Փաստինֆո