Փաստ ինֆո

Հակակոռուպցիոն դատարանում՝ դատավոր Վահե Դոլմազյանի նախագահությամբ, քննարկվում է ՀՀԿ փոխնախագահ Արմեն Աշոտյանի խափանման միջոցի հարցը։ Պաշտպան Ռուբեն Մելիքյանը հայտնեց, որ ԱԺ 33 պատգամավոր անձնական երաշխավորություն են ներկայացրել՝ երաշխավորելով Աշոտյանի պատշաճ վարքագիծը։ Երաշխավոր պատգամավորներից այս պահին դատարանում են 30-ը, որոնք պնդում են միջնորդությունը, մյուսները չեն կարողացել ներկայանալ դատական նիստին Դատարանում ներկայացված երաշխավորության վերաբերյալ դիմումը նախ պնդեց Սեյրան Օհանյանը, որն իր խոսքում նկատեց՝ տարբերակված մոտեցումը չի ապացուցում դատարանի անաչառությունը և անկախությունը, դրա շրջանակներում․ «Այն մտավախությունը, որ կան քաղաքական հետապնդման մեջ գտնվող անձինք, այդ բոլորի դատավորը Դուք եք և Դուք կարող եք հանրությանը ներկայացնել՝ փարատելով մտավախությունները»։ Դատարանում պնդեցին իրենց դիմումները մյուս երաշխավորները ևս։ ԱԺ պատգամավոր Արմեն Ռուստամյանը նշեց, որ կալանքի տակ պահելով՝ Աշոտյանին պատժում են։

Երաշխավորության միջնորդության քննությունն, սակայն, այսօր չավարտվեց։ Մեղադրյալներից Մարթա Սիմոնյանը, որն առողջական խնդիրներով պայմանավորված չի կարողանում երկար գտնվել նիստին, թույլտվություն խնդրեց՝ չմասնակցելու նիստին։ Մեղադրյալի բացակայության պայմաններում, սակայն, նիստը չէր կարող շարունակվել, ըստ այդմ, դատարանը որոշեց հետաձգել դատական նիստը։ Հատկանշական է, որ դատական նիստի մեկնարկից ի վեր պաշտպանության կողմը պնդում էր, որ առաջնային կարգով այսօր քննվի խափանման միջոցի հարցը, սակայն ավելի քան երկու ժամ դատարանում քննարկվեց ապացույցների թույլատրելիության հարցը։
Դատական նիստը կշարունակի վաղը։

Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես նախորդ տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։

Հեղինակ՝ Իզաբել Սահակյան

Աղբյուր` Փաստինֆո