Փաստ ինֆո

Չեմ կարող ասել, որ Ոսկեպարում մարդիկ առօրյա գործերով են զբաղված ու մտահոգություններ չկան։ 2 հոգի, որ հանդիպում են՝ խոսակցությունների թեման մեկն է, ինչ անենք։ Մենք մեր համար այդ հարցի պատասխանը գտել ենք, պատրաստվել մեծ պատերազմի։ Այս մասին «Փաստինֆոյի» հետ զրույցում ասաց Ոսկեպարի բնակիչներից մեկը, ով չցանկացավ իր անունը հրապարակել։

Հարցին՝ եթե զորքին հրաման լինի դիրքերը թողնել ու հետ քաշվել՝ ի՞նչ են անելու բնակիչները՝ մեր զրուցակիցը պատասխանեց, որ եթե զորքը հետ քաշվի՝ թուրքը հայտնվելու է իր տանը։ «Վերջին տարիներին տեսած բաները ցույց են տվել, որ, իհարկե, անհնար ոչինչ չի կարող լինել, բայց մեծամասնությունը դժվար թե ենթարկվի հրամանին»,- ասաց ոսկեպարցին։

Նա նաև նշեց, որ պայքարելու իրենց որոշումը վարակիչ է նաև հարևան գյուղերի, համայնքների համար, որոնց մի մասը հայտնվելու են շրջափակման մեջ, մի մասն էլ դառնալու է սահմանամերձ։ «Նրանք էլ միանշանակ ոտքի կկանգնեն, պարտավոր են իրենց իրավունքի համար պայքարել, սա միայն մեր կամ Կիրանցի, Բաղանիսի ու Ոսկեվանի խնդիր չէ, բոլորիս խնդիրն է»,- ասաց նա։

Դիտարկմանը, թե շատերը կարծում են, որ հարցի լուծումը ոչ թե Ոսկեպարում է, այլ՝ Երևանում, հետևաբար հնարավո՞ր է, որ ինչ- որ փուլում ոսկեպարցիները ակցիաներ սկսեն իրականացնել Երևանում՝ նա պատասխանեց. «Երևան եկողները շատ են, իսկ սահման եկողները՝ քիչ։ Եթե Երևանում մարդիկ ինչ- որ բան որոշեն անել, թող լավ ծանր ու թեթև անեն, չնայած, եթե լինի էնպիսի առաջորդ, ում հետ ճանապարհ անցնելը մեզ համար նորմալ լինի՝ մենք էլ դուրս կգանք պայքարի, բայց մեզ ուժեղ առաջնորդ է հարկավոր։ Գիտե՞ք ինչու են մարդիկ վախենում ուժեղ առաջնորդներից ստրուկները ուժեղներից վախենում են»։

Նիկոլ Փաշինյանը խոստացել էր կրկին գալ Ոսկեպար, բայց այդպես էլ չեկավ, արդյոք համայնքում դեռ սպասում են նրան՝ ոսկեպարցի մեր զրուցակիցն ասաց, որ արդեն նշանակություն չունի՝ կգա, թե չի գա։ «Նիկոլը շատ բան էր խոստացել ու չի արել, այս անգամ էլ վարվեց՝ ինչպես միշտ»։

Աղբյուր` Փաստինֆո