Փաստ ինֆո

ԱԺ նախկին պատգամավոր Առաքել Մովսիսյանի (մականունը՝ «Շմայս»-խմբ) որդու՝ Դավիթ Մովսիսյանի, նկատմամբ իրականացվող քրեական հետապնդման ժամկետը կասեցվել է՝ զինծառայողի սպանության վերաբերյալ ավելի քան չորս տարի քննվող քրեական վարույթով։ Այս մասին «Փաստինֆո»-ի հետ զրույցում հայտնեցին ՀՀ Քննչական կոմիտեից։

Հիշեցնենք, որ Դավիթ Մովսիսյանը մեղադրվում է ժամկետային զինծառայող Վահրամ Ավագյանի սպանության գործով։ Մասնավորապես, 2020թ. հունվարի 30-ին զորամասերից մեկում, հրազենային վիրավորումից մահացել է 2000թ. ծնված Վահրամ Մկրտիչի Ավագյանը։ Քննչական կոմիտեն տեղի ունեցածը որակել է որպես ինքնասպանություն ու քրեական գործ հարուցել ՀՀ ՔՕ 110-րդ հոդվածի 1-ին մասով՝ ինքնասպանության հասցնելու հատկանիշներով։ Ըստ ՔԿ-ի ներկայացրած վարկածի՝ զինծառայողն իր ինքնաձիգից կրակել է իր կրծքավանդակին։ Հարազատները չեն հավատում ինքնասպանության վարկածին. Նրանք պնդում էին, որ սպանությունը ներկայացվում է որպես ինքնասպանություն ու փետրվարի 2-ին սպանված զինվորի դագաղը ձեռքերին շարժվում էին դեպի Երեւան՝ ի նշան բողոքի:

Մահացած զինծառայողի հարազատները ՀՀ պաշտպանության նախարար Դավիթ Տոնոյանի հետ հանդիպումից հետո դադարեցրել են բողոքի գործողությունը: Նույն օրը հայտարարվեց քրեական գործով ձերբակալությունների մասին։ Նրանց թվում էր նաեւ ԱԺ նախկին պատգամավոր Առաքել Մովսիսյանի՝ Շմայսի, որդին՝ Դավիթ Մովսիսյանը, որին մեղադրանք է առաջադրվել ՀՀ (2003թ.) քրեական օրենսգրքի 359-րդ հոդվածի 3-րդ մասով, այն է՝ զինծառայողների փոխհարաբերությունների կանոնագրքային կանոնները խախտելը նրանց միջև ստորադասության (ենթակայության) հարաբերությունների բացակայության դեպքում, որն անզգուշությամբ առաջացրել է ծանր հետևանքներ և քննիչի կողմից միջնորդություն է ներկայացվել դատարան՝ նրա նկատմամբ որպես խափանման միջոց կալանավորումը ընտրելու համար, ինչը դատարանը բավարարել է։ Մովսիսյանը շուրջ վեց ամիս գտնվել է անազատության մեջ և ազատ արձակվել միայն հուլիսի 27-ին։ Նշենք, որ մեղադրանք է առաջադրվել նաև Վահրամ Ավագյանի երեք այլ համածառայակիցների, որոնցից երկուսի նկատմամբ որպես խափանման միջոց է ընտրվել կալանավորումը, իսկ մյուսի նկատմամբ` հրամանատարության հսկողության տակ գտնվելը։

Քննչական կոմիտեից «Փաստինֆո»-ի հետ զրույցում հայտնեցին, որ գործը նախաքննության փուլում է։
«Նշանակված է համալիր փորձաքննություն, որի եզրակացությունը դեռևս չի ստացվել։ Փորձաքննության նշանակման հիմքով մեղադրյալների նկատմամբ քրեական հետապնդման ժամկետները կասեցված են»,- հայտնեց Գոռ Աբրահամյանը՝ հավելելով, որ վարույթով 4 մեղադրյալ կա․«Երբ փորձաքննության արդյունքները կստացվեն, քրեական հետապնդման ժամկետները կվերսկսվեն և վերջնական իրավական գնահատականներ կտրվեն»։

Նշենք, որ ավելի քան մեկ տարի առաջ «Փաստինֆո»-ն տեղեկացրել էր, որ գործով Վահրամ Ավագյանի նկատմամբ հետմահու նշանակվել էր դատահոգեբանական-դատահոգեբուժական համալիր փորձաքննություն, ինչի եզրակացությունը պետք է, որ առանցքային նշանակություն ունենա գործի ելքի վրա, սակայն փորձաքննության եզրակացությունը տևական ժամանակ չէր ստացվում։ Այժմ դեռևս հայտնի չէ՝ արդյոք այս, թե այլ փորձաքննությամբ է պայմանավորված քրեական հետապնդման ժամկետների կասեցումը, թե ոչ։ Համենայն դեպս՝ ՀՀ քրեական դատավարության օրենսգրքի 193-րդ հոդվածի 3-րդ մասի համաձայն՝ մեղադրյալի նկատմամբ հանրային քրեական հետապնդման ժամկետը կասեցվում է, եթե առանց նշանակված փորձաքննության եզրակացությունը կամ առանց քրեական վարույթով իրավական օգնություն ցույց տալու մասին միջազգային հարցման պատասխանը ստանալու հնարավոր չէ լուծել մեղադրյալի նկատմամբ քրեական հետապնդումը շարունակելու կամ այն դադարեցնելու հարցը․ « յուրաքանչյուր դեպքում քրեական հետապնդման ժամկետը ոչ մեծ կամ միջին ծանրության հանցանքի վերաբերյալ մեղադրանքով կարող է կասեցվել երկու ամսից ոչ ավելի, իսկ ծանր կամ առանձնապես ծանր հանցանքի վերաբերյալ մեղադրանքով՝ չորս ամսից ոչ ավելի ժամկետով։ Ամեն դեպքում, սույն մասով նախատեսված հիմքերով քրեական հետապնդման կասեցման ընդհանուր ժամկետը նույն մեղադրյալի նկատմամբ ոչ մեծ կամ միջին ծանրության հանցանքի վերաբերյալ մեղադրանքով չի կարող գերազանցել սույն օրենսգրքի 192-րդ հոդվածով նախատեսված քրեական հետապնդման առավելագույն ժամկետները, իսկ ծանր կամ առանձնապես ծանր հանցանքի վերաբերյալ մեղադրանքով՝ նույն հոդվածով նախատեսված քրեական հետապնդման առավելագույն ժամկետների կրկնապատիկը»։

Հեղինակ՝ Իզաբել Սահակյան

Աղբյուր` Փաստինֆո