Փաստ ինֆո

Արարատի և Վայոց ձորի մարզերի ընդհանուր իրավասության դատարանի դատավոր Սարգիս Հովհաննիսյանը հայցադիմում է ներկայացրել Վարչական դատարան՝ ընդդեմ Բարձրագույն դատական խորհրդի։ Այս մասին «Փաստինֆո»-ն տեղեկանում է «Դատալեքս» դատական-տեղեկատվական համակարգից։

Դատավորը պահանջում է անվավեր ճանաչել առաջին ատյանի, վերաքննիչ և վճռաբեկ դատարանների դատավորների ներքին աշխատանքային կարգապահության կանոնները սահմանելու մասին ԲԴԽ 2023թ դեկտեմբերի 4-ի թիվ 98-Ն-35 որոշման դրույթները։

Որոշումը, հիշեցնենք, վերաբերում է դատավորների ներքին աշխատանքային կարգապահության կանոններին՝ դատավորների իրավունքներին և պարտականություններին, աշխատանքի և հանգստի ժամանակին, աշխատանքային պայմանների առանձնահատկություններին և այլն: Դատավորը վիճարկում է որոշման դրույթների հիմնական մասը, մասնավորապես՝ կետը, համաձայն որի՝ որոշումը ուժի մեջ է մտնում հրապարակման պահից։ Դատավորը վիճարկում է նաև այն կետը, որով սահմանվում է, որ Վերաքննիչ և Վճռաբեկ դատարանների գործունեության առանձնահատկություններով պայմանավորված՝ դատարանի բնականոն գործունեությունն ապահովելու անհրաժեշտությունը՝ Դատարանի նախագահը դատավորի հետ փոխադարձ համաձայնությամբ կարող է փոխել կանոնները, այդ թվում՝ այն կանոնները, համաձայն որոնց՝ դատարանում սահմանվում է 5-օրյա աշխատանքային շաբաթ՝ հանգստյան օրերը շաբաթն ու կիրակին են, ինչպես նաև՝ տոն կամ հիշատակի օր համարվող ոչ աշխատանքային օրերը, իսկ աշխատանքը սկսվում է ժամը 09:00-ին և ավարտվում 18:00-ին, ընդմիջումը՝ ժամը 13-14-ը։ Այսինքն՝ դատավորը խնդրահարույց է համարում, որ դատարանի նախագահը կարող է փոփոխել և սահմանել դատավորների աշխատանքային օրվա ժամերը, ընդմիջման ժամը, աշխատանքային օրվա ավարտը։

Բացի այդ, դատավորի համար վիճելի է այն հանգամանքը ևս, որ ԲԴԽ որոշման համաձայն՝ ընդմիջման ժամը չի ներառվում աշխատաժամանակի մեջ և դատավորն ընդմիջման ժամն օգտագործում է իր հայեցողությամբ։ Դատավորը խնդրահարույց է համարում նաև այն կետը, համաձայն որի՝ դատավորները, ովքեր իրենց խնամակալության տակ ունեն մանկահասակ երեխա և/կամ առողջական խնդիրներ ունեցող անձինք, դատարանի նախագահին նախապես գրավոր կամ էլեկտրոնային փոստի միջոցով տեղյակ պահելով՝ կարող են աշխատանքի ընթացքում բացակայել աշխատանքի վայրից օրվա ընթացքում առավելագույնը մեկ ժամ տևողությամբ, իսկ եթե այդ ժամանակահատվածը պետք է գերազանցի մեկ ժամը, ապա պետք է ներկայացվի փաստաթուղթ։ Դատավորի կողմից խնդրահարույց համարվող և վիճարկվող կետերից մեկն էլ այն է, որ յուրաքանչյուր ամսվա առաջին աշխատանքային օրը դատարանի նախագահին տեղեկատվություն է փոխանցվում նախորդ ամսվա ընթացքում դատավորների հաճախելիության վերաբերյալ:

Հայցը կքննվի Վարչական դատարանի դատավոր Աննա Դիլբարյանի նախագահությամբ, դատական կազմում ընդգրկված են դատավորներ Անի Չիլինգարյանը, Կարեն Զարիկյանը, Անի Հարությունյանը, Ելենա Առաքելյանը։

Հեղինակ՝ Իզաբել Սահակյան

Աղբյուր` Փաստինֆո