Փաստ ինֆո

Իրանի գործողությունները տարբեր ժամանակներում վերլուծելով` կարող ենք եզրակացնել, որ անպատասխան չի թողնի Դամասկոսում իր դեսպանատան վրա կատարված հարձակումը։ Այս մասին «Փաստինֆոյի» հետ զրույցում ասաց իրանագետ Ահարոն Վարդանյանը: Նշենք, որ նախօրեին Voxnews պորտալը, հղում անելով ամերիկյան հետախուզությանը, հաղորդել էր Իրանը 48 ժամվա ընթացքում կհարձակվի Իսրայելի վրա՝ ի պատասխան Լիբանանի վրա հրթիռային հարձակման և Սիրիայում Իրանի հյուպատոսության ոչնչացմանը։

Վարդանյանի դիտարկմամբ, այն որ Իրանն այդ հարվածներն անպատասխան չի թողնի՝ վկայում են, օրինակ, գեներալ Ղասեմ Սոլեյմանիի սպանությունից հետո տեղի ունեցած գործողությունները։ «Իրանը հայտարարեց, որ անպատասխան չի թողնելու և վերջին շրջանում միակ պետությունն է, որ հրթիռակոծության ենթարկեց ԱՄՆ ռազմաբազաները։ Այսինքն, եթե Իրանը հարվածում է Պակիստանին, որը միջուկային պետություն է, ապա այս դեպքում էլ, միանշանակ է, որ Իրանը անպատասխան չի թողնելու, քանի որ հարվածներ են հասցվել իր հյուպատոսարանին, որից մահացել է 18 մարդ, դիվանագետներ, բարձրաստճան սպաներ, և ոչ միայն։ Ակնհայտ է, որ այս հարվածները անպատասխան չեն մնալու, այլ խնդիր է, թե այդ հարվածը ինչպես կլինեն, երբ և ինչ մակարդակի»։

Միաժամանակ նա նկատեց, որ Իրանը համպատրաստի գործողություններ չի անի, առանց իրավիճակը համակողմանի գնահատելու։ «Կարծում եմ`Իրանը լավ ծանր ու թեթև կանի՝ մինչև պատասխան հարվածը»։

Անդրադառնալով Իրանին պատերազմի մեջ ներքաշելուն` Իրանագետն ասաց, որ գաղտնիք չէ, որ Իրանին միշտ են փորձում պատերազմի մեջ ներքաշել, բայց Իրանը կարողացել է խուսափել է դրանից։ «Բայց հիմա սա նաև իմիջի հարց է, ի վերջո, հարվածներ են հասցվել իր դեսպանատանը և Իրանը պետք է պատասխանի։ Ընդ որում՝ այդ պատասխանը կարող է լինել ոչ միայն հենց Իրանից, այլ պրոքսի ուժերի կողմից։ Չնայած, Իրանի պետական կառույցներին մոտ կանգնած մարդիկ նշում են, որ Իրանը պրոքսի ուժերի կողմից միշտ է հարվածներ հասցնում, իսկ հիմա երբ անմիջապես իրեն են հարվածել, ապա ճիշտ կլինի, որ պատասխան հարվածն էլ լինի հենց Իրանից»։

Իրանագետը չբացառեց, որ հարվածը կարող է լինել Ադրբեջանում գտնվող իսրայելական դեսպանատանը։ «Կարծում եմ, նույն ենթադրությունն ունեն նաև Իսրայելում, ու դրա համար էլ տարհանել են Ադրբեջանում գտնվող դեսպանատունը։ Միաժամանակ, տարհանել են նաև Աբու Դաբիում գտնվող իրենց դեսպանատան անձնակազմին։ Բայց Իրանը կարող է հարվածներ հասցնել ինչպես Լատինական Ամերիկայում գտնվող իսրայելական կառույցներին, այնպես Եվրոպայում գտնվողներին։ Իհարկե, այստեղ խոսքը օդային հարվածների մասին չէ, այդ հարվածները կարող են լինել տարբեր կերպ, հարվածը կամ պատասխանը կարող է լինել, ոչ թե առաջիկա 1-2 օրվա ընթացքում, այլ ավելի երկարաժամկետ կտրվածքով։ Մենք բազմիցս ականատես ենք եղել, թե ինչպես է Իրանը անկանխատեղելի հարվածներ հասցնում»։

Հարցին, թե արդյոք սա կարող է հանգեցնել լայնածավալ և անմիջական բախման՝ նա պատասխանեց, որ վստահաբար, երբ Իսրայելը հարված էր հասցնում՝ նաև պետք է պատրաստ լիներ պատասխանի։ «Իրանում ևս հստակ գիտակցում են իրավիճակը։ Ամեն դեպքում՝ հազիվ թե սա հանգեցնի անմիջական բախման։ Այստեղ հստակ կանխատեսումներ անել և ասել, թե ինչ կլինի՝ բավական բարդ է»:

Աղբյուր` Փաստինֆո