Փաստ ինֆո

Հակակոռուպցիոն դատարանում՝ դատավոր Վահե Դոլմազյանի նախագահությամբ, այսօր շարունակվել է ՀՀԿ փոխնախագահ Արմեն Աշոտյանի և մյուսների գործով դատալսումները։

«Փաստինֆո»-ի հաղորդմամբ՝ հանրային մեղադրողը դատական նիստում ներկայացրել է քաղհայց՝ պահանջելով Աշոտյանից և մյուսներից հօգուտ պետության բռնագանձել 905 մլն 194 հազ․ 706 ՀՀ դրամ գումար՝ որպես վնասի փոխհատուցում, միևնույն ժամանակ, դատախազը միջնորդեց արգելանք դնել մեղադրյալների գույքի վրա։ Պաշտպանության կողմն առարկեց՝ նշելով, որ հայցը չպետք է քննվի, այն իրավաչափ չէ։

«Սիրուն է, չէ՞, հնչում ՝ Աշոտյանից և մյուսներից բռնագանձել 905 միլիոն դրամ: 905 միլիոն դրամն Արմեն Աշոտյանի հետ կապ չունի: Սխալ հայցադիմում է ներկայացվել, չպիտի քննվի ու անմիջապես պետք է հետ վերադարձվի»,- հայտարարեց Աշոտյանի պաշտպան Տիգրան Աթանեսյանը:

Դատարանը որոշեց մերժել գույքի վրա արգելանք դնելու միջնորդությունը, իսկ հայցը՝ վերադարձնել, քանի որ այն չի համապատասխանում դատավարության պահանջները։

«Գտնում եմ հայցը չի բավարարում դատավարության պահանջները։ Գույքային հայց հարուցվում է մեղադրյալի կամ այն անձի դեմ, որոնց վրա կարող են գույքային պատասխանատվություն դնել մեղադրյալի գործունեության համար»,-ասաց դատավոր Վահե Դոլմազյանն՝ ավելեցնելով, որ հայցադիմումում նշված է մեղադրյալներից յուրաքանչյուրի դեմ պահանջ «Բայց եթե 4 մեղադրյալներից պահանջ է ներկայացվում 905 մլն գույքային վնաս, պետք է, օրինակ, նաև պատճառաբանվեր, թե ինչու մեկ մեղադրյալից պետք է գույքային պատասխանատվություն ստանալ։ Նման պատճառաբանություններ ներկայացված չեն հանրային մեղադրողների կողմից, ուստի հայցադիմումը վերադարձվում է ձեզ»։

Հաջորդիվ դատարանում քննարկվեց ապացույցների հետազոտման հարցը։ Դատական նիստը հետաձգվեց։

Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես նախորդ տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։

Հեղինակ՝ Իզաբել Սահակյան

Աղբյուր` Փաստինֆո