Փաստ ինֆո

«Հայաստանը երբեք այսքան բարձր սուբյեկտայնություն չի ունեցել»: Նման հայտարարությամբ է հանդես եկել ՀՀ ԱԺ «Քաղաքացիական պայմանագիր» խմբակցության պատգամավոր Արմեն Խաչատրյանը` մեկնաբանելով ՀՀ- արևմուտք մերձեցման գործընթացի վերաբերյալ ՌԴ ԱԳՆ խոսնակ Մարիա Զախարովայի հայտարարությունը:

Հիշեցնենք, որ Զախարովան հայտարարել է, որ ԱՄՆ-ն երբեմն մենակ է թողնում իր դաշնակիցներին, ու զգուշացրել, որ Հաայաստանը կարող է կորցնել իր ինքնուրույնությունը։

Արմեն Խաչատրյանը քննադատել է նաեւ ՀԱՊԿ-ի անվտանգային համակարգը` նշելով, որ այն ՀՀ սահմանների պաշտպանության հարցում չի գործում և հնարավոր է չգործող համակարգից ՀՀ-ն դուրս գա, երբ և ինչպես հարցը նա չի մանրամասնել.«Այլ ժամանակներում, այո՛, Մարիայի Զախարովայի երկրում էր որոշվում, թե Հյասատանը որտեղ պետք է գնա, որտեղ լինի և այլն։ Անվտանգության հետ կապված պետք է ասեմ, որ Հայաստանը, այսպես ասած, բազմաշերտ է սարքում իր անվտանգային համակարգը, ամեն ինչ անելու է, որպեսզի անվտանգային համակարգը բավարարի այսօրվա պահանջներին։ Դա ու՞մ է դուր գալիս, ում դուր չի գալիս, էական չէ , մենք գնալու ենք մեր ճանապարհով։ Եվ պետք է ասեմ, որ, ցավոք սրտի, այն անվտանգային համակարգը, որն ունեցել ենք, անվտանգային համակարգ չի եղել, դրանք ընդամենը թղթի վրա գրված պայմաններ են եղել»,- ասել է Արմեն Խաչատրյանը` չհերքելով, որ ռուսական 102-րդ բազան ունի դեր և կանգնած է հայ-թուրքական սահմանային գոտում:

«Այո, լուրջ դերակատարությունը գոյություն ունի», - նշել է քպական պատգամավորը, բայց նաեւ նշեց, թե ռուսական ռազմաբազան ոչինչ չի արել, երբ Ադրբեջանը օկուպացնում էր ՀՀ ինքնիշխան տարածքը:

Իսկ հարցը, թե արդյոք 2022թ.-ին Վայոց Ձորից օկուպացված հատվածում ևս ՌԴ 102- րդ բազայից զինվորականներ կանգնած են եղել` մնաց անպատասխան: Խաչատրյանն անդրադարձավ ՀԱՊԿ-ի հայտարարության մեջ նշված դիտարկմանը, որ ՀՀ-ն և Ադրբեջանը սահմանզատում ու սահմանագծում պետք է անեն։ Խաչատրյանը նշեց, որ ՀՀ սահմանները միջազգայնորեն ճանաչված են և մեր երկիրը ՀԱՊԿ մտել է միջազգայնորեն ճանաչված սահմաններով.-«Եթե մի անվտանգային համակարգ ասում է ՀՀ սահմաններին կասկած ունեմ` մենք այդ անվտանգային համակարգի հետ գործ չունենք»,- ասել է Արմեն Խաչատրյանը։

Աղբյուր` Փաստինֆո