Փաստ ինֆո

Վարչական իրավախախտումների վերաբերյալ օրենսգրքում կատարված լրացումները և փոփոխություններն ուժի մեջ կմտնեն ապրիլի 5-ից։ ՆԳՆ ոստիկանության պարեկային ծառայության պետի տեղակալ, գնդապետ Արման Չիլինգարյանը հրավիրված ասուլիսում մանրամասներ հայտնեց՝ նշելով, որ օրենքի հիմնական ուղղվածությունը վերաբերում է երեք հանգամանքի, մասնավորապես, առաջին հերթին կնախատեսվի խրախուսական դրույթներ նրանց համար, որոնք ունեն տուգանքի տեսքով ձևով վարչական տույժեր ունեն և ցանկություն ունեն շուտ իրազեկվել էլեկտրոնային եղանակով, վարչական ակտը կատարել։ Երկրորդ վերաբերում է ժամկետից շուտ տուգանքը վճարելու համար խրախուսական նորմ սահմանելուն։ Բացի այդ, մինչև ապրիլի 5-ը կատարած իրավախախտումների համար կիրառված տուգանքները օրենքի ուժի մեջ մտնելուց եռամսյա ժամկետում կամ մինչև օրենքի ուժի մեջ մտնելը դրա 50 տոկոսը վճարելու պարագայում, իսկ հարկադիր կատարման վարույթում գտնվելու դեպքում, նաև կատարողական ծախսերը կատարելու դեպքում, դրանք կհամարվեն ավարտված։

Չիլինգարյանի խոսքով՝ հաջորդ խրախուսական դրույթը, որը գործելու է հունիսի 1-ից՝ վերաբերում է տեսալուսանկարահանող սարքերով և արագաչափերով արձանագրված խախտումներին։

«Այն անձինք, ովքեր նախապես կգրանցվեն և կտրամադրեն էլեկտրոնային փոստ՝ կստանան օրենքով նախատեսված տուգանքի 20 տոկոսով պակաս տուգանք, 10 հազար դրամ տուգանքի դեպքում կստացվի 8000 դրամ, դրանից հետո կգործի 30 տոկոս պակաս վճարելը, այսինքն՝ եթե էլեկտրոնային եղանակով ծանուցվի և 15 օրյա ժամկետում վճարի տուգանքը, ապա կստացվի, որ 5000 դրամ տուգանքի դեպքում կվճարի 2800 դրամ»,- նշեց նա, ապա ավելացրեց՝ այս դրույթները մոտ 600 հազար կատարողականի են վերաբերել, որը գերազանցել է 8մլդ դրամը, սակայն այդ թիվը փոփոխման ենթակա է, քանի որ դրանք հաշվարկվել են այս օրենքի նախագծային փուլում։

Աղբյուր` Փաստինֆո