Փաստ ինֆո

«Գոյ» թատրոնի դերասանները արդեն մի քանի օր է չեն կարողանում մուտք գործել թատրոն։ Օրեր առաջ թատրոնի դռան վրա գրություն են հայտաբերել, որ կարող են ներս մտնել Գաբրիել Սունդուկյանի անվան թատրոնի մուտքով, սակայն նրանց այնտեղով ևս թույլ չեն տվել մտնել ներս։ Այսօր թատրոնի դերասանական կազմը փորձում էր մուտք գործել թատրոն` «Գաբրիել Սունդուկյանի» անվան թատրոնի մուտքով` թատրոնի տնօրենից պարզաբանումներ ստանալ։

«Գոյ» թատրոնի գեղարվեստական ղեկավար, ռեժիսոր Արթուր Սահակյանը լրագրողների հետ զրույցում նշեց, որ իրենց թատրոնի աշխատանքը խաթարված է` մեկ այլ թատրոնի տնօրինության պահվածքի պատճառով։

«Նրանք իրենց այնպես խաղաղ են հիմա պահում` առանց հասկանալու, որ իրենց կոլեգաները արժանանում են ինչ-որ ապօրինությունների։ Հիմա մենք գնում ենք մտնելու ներս՝ առանց որևէ բան ստորագրելու, որովհետև ստորագրել՝ կնշանակի մտնել իրենց կազմի մեջ, բայց նման բան չի կարող լինել։ Մենք Սունդուկյանում չենք ուզում աշխատել, բայց հիմա առավել ևս չենք կարող աշխատել իրենց կազմում, աշխատել մի տնօրինության հետ, որն իր խնդիրն է համարում փակել թատրոնը՝ թատրոնի մարդ լինելով։ Այս ընտանիքում մենք անելիք չունենք, մենք ունենք մեր ընտանիքը», նշեց նա:

Թատրոնի աշխատակիցները մոտեցան Սունդուկյանի անվան թատրոնի մուտքին, սակայն չկարողացան ներս մտնել։
Նրանց դիմավորեց Սունդուկյանի անվան թատրոնի փոխտնօրեն Հրաչ Ներսիսյանը, նա ասաց, որ Սունդուկյան թատրոնը պահանջ է ներկայացրել, թե ոնց իրենք պետք է մտնեն ներս։ Մասնավորապես` պետք է թերթիկներ լրացնեն՝ անվտանգության համակարգում իրենց տվյալները լրացնելու համար, որից հետո իրենց տվյալները կանցկացնեն համակարգում ու թույլ կտրվի մտնել շենք։

«Գոյ» թատրոնի դերասան Սամվել Թոփալյանն ասաց, որ ինքը պայմանագիր ունի «Գոյի» հետ և չի համարվում Սունդուկյանի աշխատակից։ Դերասաններից մեկն էլ պարզաբանեց, որ իրականում իրենց ծանուցել են, որ պետք է գան ու նոր թարմացված պայմանագիր կնքեն։ Բայց մարդ կա, մինչև ապրիլի 22-ը ժամանակ ունի մտածելու՝ աշխատի, թե չաշխատի Սունդուկյանի հետ։ «Քանի որ իրենց պայմանագրի ժամկետը լրացած չէ, իրենք պահանջում են, որ իրենց մուտքը բացեն, ժամանակը լրանա, իրենք կմտածեն՝ ստորագրե՞ն նոր պայմանագիր, թե՞ ոչ։

Ներսիսյանն աաց, որ արդեն չկա մեր կամ ձեր թատրոն, դա արդեն բոլորիս թատրոնն է, առանձին չի։ «Դուք էլի կարող եք գալ թատրոն, բայց այս մուտքով։ Սունդուկյանում, բոլորը ենթարկվում են այս կարգին»։ Նա նաև առաջարկեց հարցը քննարկել Սունդուկյանի փոքր բեմում, «Գոյի» դերասանական կազմն հակադարձեց՝ թե գնանք «Գոյի» բեմ։

Ներսիսյանն ասաց, որ բանալիներն ամբողջը չունի, մյուս կողմից էլ «Գոյի» բեմը վիճելի տարածք է։ «Երբ Ձեր տվյալները կտաք՝ քարտերը կստանաք, ձեր բանալիները կհանձնեք՝ կբարձրանաք ձեր բեմ»։

Աղբյուր` Փաստինֆո