Փաստ ինֆո

Նախօրեին վարչապետ նիկոլ Փաշինյանի հետ տեղի ունեցած հանդիպումից անհայտ կորածների հարազատները հերթական անգամ հիասթափված են դուրս եկել։

«Փաստինֆոյի» հետ զրույցում հարազատներից մեկը նշեց, որ Փաշինյանի մոտ մի հարցով են գնում, ո՞ւր են մեր երեխեքը, եթե ողջ են` բերեք, եթե զոհված են՝ մարմինները բերեք։ «Ուրիշ հարց մենք չունենք, մեզ միայն մեր երեխեքի ճակատագիրն է հետաքրքրում», - նշեց մեր զրուցակիցը։

Հարցին թե ինչ պատասխան են ստացել՝ նկատեց. «Իսկ մեր երկրում ղեկավար կա՞, վարչապետից սկսած մինչև պաշտպանության նախարար, մինչև պատգամավոր, ունե՞նք, թե՞ մանկապարտեզ ունենք, մենք ղեկավարություն չունենք։ Բարձիթողի վիճակ է, չունենք մարդ, որ կարող է մեր երկրի հարցը լուծել, ուր մնաց մեր հարցերին պատասխանեն, մանկապարտեզ է։ Վարչապետը 8 հատ քարտեզ է փոխանցում, ու սպասում, որ դրա դիմաց Ադրբեջանն իր հետ բանակցի՝ էլ էդ վարչապետից ի՞նչ պատասխան կարող ենք ստանալ»։

Դիտարկմանը, որ եթե չեն հավատում, որ այս կառավարությունը կարող է լուծում տալ իրենց բարձրացրած հարցին՝ ինչո՞ւ են գնում հանդիպման՝ նա պատասխանեց. «Նիկոլը, ԱԳ նախարարը, մյուսները՝ գնում են Ադրբեջանի ներկայացուցիչների հետ հանդիպման։ Բա չիմանա՞նք, մեր երեխեքի հարցը այդ հանդիպումներում բարձրաձայնո՞ւմ են, թե՞ չէ։

Էս անգամ Նիկոլն ասաց, թե ադրբեջանցիք երդվում են, որ իրենց մոտ 23 գերիներից բացի՝ ուրիշ պահվող անձ չկա, այսինքն` ինքը հավատում է այդ երդմանը։ Եթե ադրբեջանցու խոսքին հավատում են, մենք էլ ո՞վ ենք։ Եթե վարչապետի բերանից լսում ես, որ Ադրբեջանի երդմանը հավատում է, նրա համար հիմք է ադրբեջանցու ասածը՝ մենք էլ ինչի՞ հավատանք, բա ուր են մեր երեխեքը, էդ երեխեքը հօդս չեն ցնդել, միգուցե աֆիցերների տա՞նն են, բայց ինքը «դեբիլ է», մենք նրա ոչ մի խոսքին էլ չենք հավատում, ամենահեշտ պատասխանը՝ «չէ» է, մարդկանց ցրելու միջոց է, նա էլ ասում է», - ասել է անհետ կորածի ծնողը ու ավելացրել, որ իր համար նրա ասածը հիմք չէ:

«Քանի շնչում եմ` փնտրելու եմ իմ երեխուն, ինչ մնում է նրա ասածին՝ իր կինն ու երեխեքն էլ չեն հավատում, ես իրեն ո՞նց հավատամ, ես փորձելու եմ այլ ճանապարհներ գտնել», - նշեց մեր զրուցակիցը։

Նրա փոխանցմամբ` 174 զինվորական և 20 քաղաքացիական անհետ կորածներից շատ քիչ ծնողներ են ներկա գտնվել հանդիպմանը. մի մասը համակերպվել են հարազատի կորստի հետ, մյուսները դեռ շարունակում են ճանապարհներ փնտրել։ «Ամբողջ երկիրն է բարձիթողի վիճակում, ոչ մեկ իր տեղում չէ, ոչ մեկ չի աշխատում, ոչ քննչական կոմիտեն, ոչ դատախազությունը, ոնց հասկանում եմ, սպասում են ամիսը լրանա՝ իրենց պրեմիաները ստանան, դրա համար են աշխատում, էս երկիրը տանուլ են տվել, ժողովրդին ճնշել են, բայց մենք չենք կարողանալու համակերպվել: Ո՞նց կլինի՝ մարդու սիրտը չլինի ու նա շարունակի ապրել, կլինի՞, ես շատերին գիտեմ, որ փնտրտուքի մեջ են, ամեն մեկն իր իմացած ձևով երեխա է ման գալիս։ Ես վաղուց եմ հասկացել, որ այդ գործում մեզ մենակ են թողել։ Գիտեք, պատերազմի ընթացքում երեխուն փնտրելիս կառավարությունն ասում էր երեխուդ ման արի հիվանդանոցներում ու մորգերում։ Բայց չեմ զարմանում, ամբողջ ազգն է հիմա մոլորված, առհասարակ, հայ մարդը՝ մարդու մեղք է գալիս, ճնշված, մոլորված, մի 10 տոկոսի համար է լավ, մյուսները մոլորված են, չգիտեն ինչ անեն», - մտահոգված ասաց անհետ կորածի հայրը։

Աղբյուր` Փաստինֆո