Փաստ ինֆո

Նախօրեին հնչած կրակոցներին շատ լրջություն պետք չէ տալ, դրանք միշտ էլ եղել են, բայց հիմա այդ կրակոցների նպատակը հենց այն է, որ հասարակությունը խոսի դրանց մասին, խոսի լայնամասշտաբ պատերազմի մասին, մարդիկ սկսեն վախենալ, այսինքն վախի ու խուճապի մթնոլորտ ստեղծի: Այս մասին ԱԺ-ում լրագրողների հետ զրույցում ասաց «Հայաստան» խմբակցության պատգամավոր Գառնիկ Դանիելյանը` նշելով, որ նախկինում այդ կրակոցները միշտ էլ եղել են, ու ոչ մեկ խուճապի չի եղել, ոչ էլ վախեցել ենք։ Հակառակը, կրակոց է եղել՝ համարժեք պատասխան են ստացել ու մի քանի ամիս մոռացել են դրա մասին։

«Հարևան երկրի իշխանությունների մեթոդիկան է, եթե անգամ Տավուշի 4 գյուղերն էլ հանձնեն՝ ի՞նչ եք կարծում, կրակոցները դադարելո՞ւ են, իհարկե ոչ, շատ ավելի վատ է լինելու, այնպես են անելու, որ շրջակայքի գյուղերը անկենսունակ լինեն», - արձանագրել է պատգամավորը։

Դիտարկմանը, թե Փաշինյանը պնդում է, որ ընդդիմությունը մանիպուլացնում է՝ ասելով, թե հայկական տարածքներ են հանձնվում՝ Դանիելյանն ասաց, որ նոյեմբերի 9-ի հուշագրից հետո էլ էին ասում, որ հող չեն տալու, իսկ ընդդիմությունը մանիպուլացնում է։ «15 օր առաջ եկել էր, գյուղի մեջտեղում կանգնել ու ասել՝ պիտի հանձնվի, իսկ մինչ այդ ասում էր մանիպուլացնում է ընդդիմությունը, ասում է՝ նավոտկա եք տալիս։ Որտե՞ղ է մոլորեցնում ընդդիմությունը, ինքը չի՞ գնացել ասել, ինքն է՞ չէ ասել՝ 4-ը կտանք, հետո կսպասենք՝ տեսնենք Ադրբեջանն էլ ինչ պահանջներ է ներկայացնում»։

Անդրադառնալով ՀՀ իշխանությունների պնդումներին՝ թե այդ տարածքները ադրբեջանական են՝ Դանիելյանն ասաց, որ այդ հայտարարություններից հետո՝ Ադրբեջանի միլի-մեջլիսի պատգամավորներն հայտարարում են, որ Հայաստանը այդ տարածքները ճանաչում է Ադրբեջանի մաս, ստացվում է մեր զինվորներն այնտեղ ապօրինի են կանգնած, կարանք ամեն վայրկյան այդ զինվորներին գերեվարենք։ Դեմարկացիա չի արված, դելիմիտացիա չի արված, էդ էլ հո Գորիս -Կապան Ճանապարհը չի, առանց դեմարկացիայի ո՞նց եք ասում, որ դա մերը չի։ Ես էլ ասում եմ՝ չէ մեր տարածքն է։ Մենք դրա համար 2 հատ հիմք ունենք, այն քարտեզը, որով մտել ենք Խորհրդային Միության կազմի մեջ և այն քարտեզը որով անկախացել ենք։ 1920 թ-ի քարտեզով մինչև Ղազախ մեր տարածքն է, 1993 թ-ին՝ փաստացի, երբ Հեյդար Ալիևը մտել է ԱՊՀ կազմի մեջ՝ փաստացի ճանաչել է այն սահմանը, որը դե ֆակտո եղել է։ Այսինքն, 1993 թ-ի սեպտեմբերի 24-ի դե -ֆակտո սահմաններն ընդունել են այդ սահմաններն ու մտել է ԱՊՀ կազմի մեջ։ Ոչ սկիզբն եք ընդունում, ոչ վերջը, ասում եք՝ էս քարտեզը ձեռք է տալիս Ադրբեջանին՝ տանք, այդտեղ ճշմարտությունը որտե՞ղ է»։

Աղբյուր` Փաստինֆո