Փաստ ինֆո

Ադրբեջանը ճնշում է գործադրում Հայաստանի իշխանությունների վրա, որպեսզի նրանք հրաժարվեն միջպետական հայցերից։ Այն մոտեցումն էլ, որ Ադրբեջանն էլ հավասար հիմունքներով կհրաժարվի Հայաստանի դեմ հայցերից, ամենեւին էլ տեղին փաստարկ չէ, որովհետեւ մենք չունենք սիմետրիկ վիճակ։ Այս մասին հրավիրված մամուլի ասուլիսին ասաց իրավապաշտպան Սիրանուշ Սահակյանը։

«Եթե լիներ երկկողմանի ագրեսիա, երկկողմանի հանցագործություններ լինեին կամ զավթումներ լինեին, երկկողմանի էթնիկ զտումներ լինեին, և երկու կողմերն էլ իրավիճակի նկատմամբ հավասար մոտեցում ցուցաբերեին, միգուցե սա ընդունելի լիներ։ Սակայն մենք ոչ հավասար իրավիճակում ուզում ենք ունենալ հավասար լուծումներ, ինչն անխուսափելիորեն ծնելու է անարդարություն»,- ասաց Սիրանուշ Սահակյանը։

Իրավապաշտպանը նկատեց, որ, օրինակ, ՄԱԿ-ի միջազգային դատարանում կողմ չեն կարող լինել անհատները, պետությունները պետք է լինեն կողմեր, ինչն էլ էական ազդեցություն կունենա իրավական գործընթացների վրա։
«Օրինակ՝ ռասիստական խտրականության ձևերի խնդիրներ անհատները կամ տուժողները չեն կարող ներկայացնել ՄԱԿ-ի դատարան։ Եվ ՄԱԿ-ի դատարանի կողմից ընդունված ակտերը ոչ միայն ունեն իրավական պարտադրականություն, այլ կարող են գգեներացնել լուրջ քաղաքական ճնշում»,- նշեց նա։

Նրա խոսքով՝ թերևս իրավական գործողությունների հնարավորություն կա ՄԻԵԴ-ում, որտեղ և՛ միջպետական, և՛ անհատական գանգատների հնարավորություն կա։ Նրա խոսքով՝ այս պայմաններում էլ կարծում ենք, որ վնասներն էական են լինելու, ուստի պետք է ձեռնպահ մնալ այդպիսի գործողություններից։

Աղբյուր` Փաստինֆո