Փաստ ինֆո

Թուրքիայի այս ընտրություններին Էրդողանն ու ընդհանրապես երկրում անցկացվող ընտրական համակարգն անակնկալ ունեցան։

Այդ երկրի գլխավոր ընդդիմադիր ուժը համարվող քեմալական «Ժողովրդահանրապետական» կուսակցությունը (CHP) խոշորագույն քաղաքներում վստահ հաղթանակ է տարել իշխող «Արդարություն և զարգացում» կուսակցության նկատմամբ։ Այս մասին հայտնում են թուրքական լրատվամիջոցները։ 

Երկրորդ տեղը զբաղեցրել է «Նոր բարօրություն» կուսակցությունը։ Այս կուսակցությունը ձևավորել է երկրի քաղաքական կյանքում տասնամյակներով արմատական դեր ունեցած 1996-97 թ.թ.-ին երկրի վարչապետի պաշտոնը զբաղեցրած, ապա զինվորականների ճնշման տակ հրաժարական տված Նեջմեթթին Էրբաքանի որդին։

«Փաստինֆո»-ն հիշեցնում է, որ Էրբաքանը համարվում է Էրդողանի հոգևոր հայրը, որի հիմնադրած կուսակցությանն էր անդամագրվել նա երիտասարդ տարիներին։ «Նոր բարօրություն» կուսակցության ի հայտ գալը և երրորդը լինելը մեծ հարված էր Էրդողանին, քանի որ իսլամական հայացքներով, այդ կուսակցությունը մեծ քանակությամբ քվեներ վերցրեց և Էրդողանի համակիրների շրջանակից։

Ըստ հրապարակված նախնական տվյալների, երկրի երեք խոշոր քաղաքներում Ստամբուլում, մայրաքաղաք Անկարայում եւ Իզմիրում հաղթում են ընդդիմադիր «Ժողովրդա-հանրապետական» կուսակցության թեկնածուները Իմամօղլուն, Մանսուր Յավաշը և Ջեմիլ Թուգայը, որոնք առաջ են անցել իշխող «Արդարություն եւ զարգացում» կուսակցության թեկնածուներից Մուրադ Քուրումից, Թուրգութ Ալթինոքից եւ Համզու Դաղից։ Ստամբուլում, ընտրություններում առաջատար է  Էքրեմ Իմամօղլուն, որը հավաքել է ընտրողների ձայների 50.27 տոկոսը։

Անկարայում գործող քաղաքապետը նույնպես ընդդիմադիր թեկնածու Մանսուր Յավասն է։ Նա ստացել է ձայների 58.58 տոկոսը։

Իզմիրում հաղթում է Ջեմիլ Թուգայը ձայների 48.06%-ով։

Ընտրությունների արդյունքների հրապարակումից հետո Թուրքիայի նախագահը դիմել է ժողովրդին, ասելով. «Մենք անշուշտ անհրաժեշտ քայլեր կձեռնարկենք, հիմք ընդունելով, քվեատուփի արդյունքներով ազգի մեզ հղված ուղերձը»։

Թուրքագետը «Փաստինֆո»-ի հետ զրույցում նկատել է, որ կարևոր է հատկապես Ստամբուլի ընտրություններում Էքրեմ Իմամօղլուիի հաղթանակը, որը վերջին 20 տարում, իրավացիորեն համարվում է Էրդողանի ամենավտանգավոր մրցակիցը եւ, հավանաբար, 2028թ. կայանալիք նախագահական ընտրություններում կներկայացնի ընդդիմությանը։ Իմամօղլուիի հաղթանակը կարևորվում է հատկապես այն հանգամանքով, որ քեմալականների թեկնածուն անթաքույց վայելում է Արևմուտքի, մասնավորապես` ԱՄՆ-ի հովանավորությունը, իսկ սա չափազանց կարեւոր է լինելու հարավկովկասյան տարածաշրջանի իրադարձությունների համար, հատկապես Հայաստանի հետ կապված իրադարձությունների կտրվածքով։ 

Աղբյուր` Փաստինֆո