Փաստ ինֆո

Փաշինյանը, ժողովրդին պատերազմով վախեցնելով, ոստիկանական ծեծ ու ջարդով, սահմանին կռվող տղաներին բռնելով, վախի մթնոլորտ ստեղծելով, մեզ կամաց-կամաց տանում է կապիտուլյացիա ստորագրելու։ Այս մասին «Փաստինֆոյի» տաղավարում ասաց «Սև հովազ» ջոկատի հրամանատար Սերոբ Գասպարյանը՝ ավելացնելով, որ ըստ օդում կախված լուրերի՝ շուտով անվերապահ կապիտուլյացիա պետք է ստորագրվի ու Հայաստանը աշխարհում ոչ մի քաղաքական գործընթացի չի մասնակցելու, չենք ունենալու բանակ, ապրելու ենք թուրքական լծի տակ։

«Մարդը պիտի գիտակցի, որ մենք ասում ենք Մայր Հայաստան, մենք Հայաստանը կաչում ենք Մայր , էսօր մեր մորը, մեր սրբությանը բռնաբարում են, իսկ մարդիկ անտարբեր են»,- նշել է հրամանատարը, ում եղբայրը ու եղբորորդին զոհվել են 44 -օրյա պատերազմում։

Գասպարյանն ընդգծեց, որ այս իրավիճակը փոխելու համար նախաձեռնել են նվիրյալների շարժում։
«Շատ շուտով նվիրյալները դուրս են գալու՝պայքարելու հանուն մեր մայրերի, մեր հայրենքի, մեր հավատի փրկության, սա չի լինելու քաղաքական շարժում, լինելու է նվիրյալների շարժում, որովհետև նվիրյալները չեն դավաճանում»,- ասել է Ս.Գասպարյանը։

Նա ընդգծեց, որ եթե հիմա Փաշինյանի ձեռքը չբռնեն՝ Հայաստանի հանրապետություն գոյություն չի ունենալու։ «Համոզված եղեք, որ մեր տարածաշրջանում կրակ է բռնկվելու, եթե մենք հիմա այս մարդու ձեռքը չբռնենք, ոչնչանալու է Հայաստանը, չի լինելու Հայաստան, թափառական ենք դառնալու։ Դա սպառնում է այն ազգին, որ 5000 տարի պայքարել է իր գոյության համար, բայց ես կարծում եմ, որ մենք կարող ենք պահել այն երկիրը...

Ես եղել եմ թե արևմուտքի, թե արևելքի տարբեր երկրներում, մարդիկ ասում են՝ կռվեք, եթե քո տունը չես պահում, ո՞վ է պահելու, եթե ես իմ ընտանիքը, իմ երեխաներին չպաշտպանեմ, հարևանը դա չի անի, եթե հարևանը տեսնի, որ ես կռիվ եմ տալիս իմ տան համար՝ օգնության կգա ինձ, բայց մենք բոլորին նեղացրել ենք, բոլորի թշնամի ենք համարել»,- նշեց ազատամարտիկը։

Դիտարկմանը թե իշխանությունը պնդում է, որ բանակը պատրաստ չէ պատերազմի՝ նա պատասխանեց, որ 6 տարի այս իշխանությունը ժամանակ է ունեցել պատրաստվելու։

«Խրամատներն ինչի՞ չեք կառուցում, անտեղի համերգներ, նոր տարի, կառնավալ, ինչի համար ասես փող եք տվել, բայց այսօր բանակում տեղեր կան, չեմ ասում ամենուր այդպես է, զինվորին ոչ նասկի, ոչ մայկա, ոչ մի բան չեն տալիս։ Անգամ տեղեր կան, որ զինվորը տուն է զանգում, ասում է՝ հայրիկ, խնդրում եմ 3000 դրամ փող ուղարկի, որ լապատկա առնենք, խրամատ փորենք։ Ո՞վ է մեղավոր, որ բանակն այս վիճակի է»,-ասաց Գասպարյանը։

Մանրամասները՝ հարցազրույցում

Աղբյուր` Փաստինֆո