Փաստ ինֆո

Երկար տարիներ ՀՀ տնտեսության զարգացման համար էական խոչընդոտ է շարունակում մնալ չօգտագործվող անշարժ գույքը՝ հողը և շինությունները: Այս մասին իր ֆեյսբուքյան էջում գրել է ԱԺ Տնտեսական հարցերի մշտական հանձնաժողովի նախագահ Բաբկեն Թունյանը՝ մանրամասնելով.

Մի կողմից, ունենք ֆիզիկական և իրավաբանական անձանց պատկանող բազմաթիվ նման գույքեր, մյուս կողմից՝ բիզնեսներ, որոնք աշխատելու տարածքի խնդիր ունեն:

Թվում է՝ նման իրավիճակում շուկան ինքը պիտի խնդիրը լուծեր, հավասարակշռելով առաջարկն ու պահանջարկը, սակայն փաստն այն է, որ այդ գույքի մեծ մասը չի օտարվում ու վարձակալության չի տրվում՝ շարունակելով մնալ չօգտագործվող, գնալով մաշվել, խոչընդոտել նոր ներդրումները և նվազեցնելով տնտեսական աճի պոտենցիալը:
Ակնհայտ է, որ այստեղ գործ ունենք Market failure (շուկայի ձախողման հետ) և պետությունն անելիք ունի: Սակայն խնդիրը բարդ է և բազմաշերտ:

Նախ պետք է հստակ չափորոշիչներ մշակել՝ հասկանալու համար որ գույքը կարելի է համարել չօգտագործվող: Որից հետո գույքագրել այդ ամենը և մեխանիզմներ մշակել՝ խթանելու համար դրանց օտարումը կամ փոխանցումը այն սուբյեկտներին, որոնք կօգտագործեն դրանք:

Ameria կառավարման խորհրդատվական ծառայությունը և ACSES վերլուծական կենտրոնը՝ Միացյալ Թագավորության զարգացման գործակալության աջակցությամբ, վերլուծություն են արել արտադրական նշանակության չօգտագործվող գույքի վերաբերյալ:

Ameria-ի ղեկավար Տիգրան Ջրբաշյանը երեկ ՔՊ խմբակցության պատգամավորներին ներկայացրեց հետազոտության արդյունքներն ու խնդրի լուծման իրենց առաջարկները:

Տեղի ունեցավ բավականին հետաքրքիր ու օգտակար քննարկում, որին պատգամավորներից բացի մասնակցում էին նաև Էկոնոմիկայի նախարար Գևորգ Պապոյանը, Կադաստրի կոմիտեի ղեկավար Սուրեն Թովմասյանը, ֆինանսների նախարարի տեղակալ Արման Պողոսյանը, ՏԿԵ նախարարի տեղակալ Հովհաննես Հարությունյանը, ՏԿԵՆ պետգույքի կառավարման կոմիտեի ղեկավար Առնակ Ավետիսյանը և պաշտոնատար այլ անձինք:

Հաշվի առնելով խնդրի կարևորությունը՝ պայմանավորվեցինք շարունակել քննարկումները և համագործակցելով ոչ պետական հատվածի փորձագետների հետ՝ մշակել արդյունավետ լուծումներ:

Աղբյուր` Փաստինֆո