Փաստ ինֆո

Ոստիկանության Նոր Նորքի բաժնի տարածքում ահաբեկչության գործով այսօր վաղ առավոտից խուզարկություններ են իրականացվում ԱԺԲ ղեկավար կազմի, այդ թվում՝ Ժիրայր Սեֆիլյանի, Կարող Եղնուկյանի, ինչպես նաև՝ նրանց աջակիցների բնակարաններում։ 

ՀՀ քննչական կոմիտեից «Փաստինֆո»-ի հետ զրույցում հայտնեցին, որ Ոստիկանության Նոր Նորք վարչական շրջանի բաժնում կատարված առերևույթ ահաբեկչության վերաբերյալ քրեական վարույթի շրջանակներում միաժամանակյա խուզարկություններ են իրականացվում շուրջ 4 տասնյակ հասցեներում, իրականացվում են նաև այլ քննչական գործողություններ։

«Հավելյալ ինֆորմացիա չի տրամադրվում»,- նշեցին ՔԿ-ից։

Հիշեցնենք, որ մարտի 24-ին նռնակով զինված երեք տղամարդ, որոնք, ինչպես պարզվել է հետագայում, «ԱԺԲ» աջակիցներ են, փորձել են ներխուժել Ոստիկանության Նոր Նորքի բաժին։ Ոստիկանության շենքի մոտ նռնակ են պայթեցրել, ինչի հետևանքով նռնակով զինված անձանցից երկուսը բեկորային վիրավորվում են ստացել՝ իրենց իսկ նռնակներից եւ տեղափոխվել են հիվանդանոց։ Երրորդ տղամարդուն վնասազերծել է ԱԱԾ հատուկ նշանակության «Ալֆա» ջոկատը։ Դեպքի առթիվ ախաձեռնվել է քրեական վարույթ ՝ ՀՀ քրեական օրենսգրքի 308-րդ հոդվածի 1-ին մասի (ահաբեկչություն) հատկանիշներով։ Նրանց մեղադրանք է ներկայացվել ՀՀ քրեական օրենսգրքի 308-րդ հոդվածի 1-ին մասով (ահաբեկչությունը) և 335-րդ հոդվածի 2-րդ մասով (խմբի կազմում հրազենի, դրա հիմնական բաղկացուցիչ մասերի, ռազմամթերքի և այլ նյութերի, սարքերի, առարկաների ապօրինի շրջանառությունը) նախատեսված հանցավոր արարքներ կատարելու համար։ Մեղադրյալներից երկուսը կալանավորվել են, մեկը՝ գտնվում է հիվանդանոցում։

Հեղինակ՝ Իզաբել Սահակյան

Աղբյուր` Փաստինֆո