Փաստ ինֆո

ԲԴԽ անդամ, Արմավիրի մարզի ընդհանուր իրավասության դատարանի դատավոր Էդգար Հովհաննիսյանը վստահեցնում է՝ իր նկատմամբ ճնշումներ չկան։ Այս մասին լրագրողների հետ զրույցում ասել է Էդգար Հովհաննիսյանը։

Պատասխանելով «Փաստինֆո»-ի թղթակցի հարցին՝ արդյո՞ք մտահոգիչ չէ, որ չորս դատավոր հրաժարականի դիմում է ներկայացնում, ըստ լուրերի՝ «չաթի» արտահոսքի պատճառով, երեկ դատավոր Վազգեն Ռշտունին հայտարարեց ԲԴԽ անդամի թեկնածությունից հրաժարվելու մասին՝ ակնարկելով ճնշումների մասին, Էդգար Հովհաննիսյանը նշեց․ «Մտահոգիչ է, եթե նման բաներ կան։ Ավելի ճիշտ կլինի, որ կոնկրետ լինի ու քննարկման առարկա դառնա, եթե չի բարձրաձայնվում, չի բացահայտվում դրա ենթատեքստը, ես չեմ կարող դրան ուղիղ պատասխան տալ»։ Դիտարկմանը՝ որպես ԲԴԽ անդամ դիմե՞լ է արդյոք այդ դատավորներին՝ պարզելու, թե արդյոք ճնշումներ եղել են այդ դատավորների նկատմամբ՝ նկատի ունենալով, որ սահմանադրորեն ԲԴԽ-ն դատավորների անկախության երաշխավոր է՝ Հովհաննիսյանն արձագանքեց՝ նշելով․ «Ոչ, չեմ դիմել։ Նրանք էլ չեն բարձրաձայնել, որ նրանց նկատմամբ որևէ ճնշում կա»։

Էդգար Հովհաննիսյանը նշեց, որ ԲԴԽ-ում այդ հարցերով քննարկումներ չեն եղել, որևէ հարց քննարկվում է՝ համապատասխան դիմումի, հաղորդման կամ ԶԼՄ տեղեկության հիման վրա։

Աղբյուր` Փաստինֆո