Փաստ ինֆո

Ակնհայտ է, որ Նիկոլ Փաշինյանը վախեցած է, բայց ես կարծում եմ, որ նրա վախերի աղբյուրը ոչ թե Ադրբեջանն է ու այդ երկրի՝ իր գործընկեր նախագահը, այլև այդ վախերը գալիս են Հայաստանի Հանրապետությունից, Հայաստանի ժողովրդից, նաև Արցախի ժողովրդից։ Այս մասին «Փաստինֆո»-ի հետ զրույցում ասաց քաղաքագետ Ստեփան Դանիելյանն՝ անդրադառնալով Նիկոլ Փաշինյանի այսօրվա կառավարության նիստում հնչեցրած հայտարարությանը, թե, իբր ,ԼՂ-ից բռնի տեղահանված որոշ շրջանակ անում է գործողություններ և քայլեր, որոնք սպառնալիք են ստեղծում Հայաստանի ազգային անվտանգությանը՝ հայտարարություններ հնչեցնելով վտարանդի կառավարության և այլնի մասին։

Քաղաքագետն ընդգծեց, որ Փաշինյանն առաջին անգամ չէ, որ նման բովանդակությամբ հայտարարություն է անում։ ։ «Կարծում եմ՝ ակնհայտ է, որ իրենց նպատակն է աշխարհաքաղաքական փոփոխությունների գնալ, դրա համար էլ այս իշխանությունների ու Փաշինյանի համար անհրաժեշտ է Արցախի թեման փակելը»,- արձանագրեց փորձագետը։

Ըստ նրա՝ այդ թեման փակ չէ՝ անկախ նրանից, թե ինչ դիրքորոշում կունենա Հայաստանի կառավարությունը։ «Վստահաբար, աշխարհաքաղաքական զարգացումների փոփոխության դեպքում Արցախի թեման նորից բացվելու է։ Հիմա Փաշինյանը փորձում է փակել անգամ արցախցիների իրավունքների խնդիրը, որի մասին ինքը ժամանակին խոսում էր։ Խոսքը Արցախի ժողովրդի՝ իրենց հողում ապրելու իրավունքի մասին է, արցախահայերը այդ իրավունքները փորձում են հետապնդել և փորձում են պահպանել իրենց կառույցները, որպեսզի հետագայում աշխարհաքաղաքական փոփոխությունների դեպքում հնարավոր լինի վերադառնալ այդ հարցին։ Այս ու նմանատիպ բոլոր հայտարարությունների նպատակը հենց այն է, որ ինքը ուզում է վերջնականապես փակել այդ հարցը, բայց դա իր մոտ միանշանակ չի ստացվելու»,-ասաց քաղաքագետը։

Աղբյուր` Փաստինֆո