Փաստ ինֆո

«Ապօրինի ծագման գույքի բռնագանձման մասին» օրենքի սահմանադրականության հարցը շարունակում է մնալ առկախված, իսկ վարույթը՝ կասեցված, թեև կասեցման հիմքը փաստացի վերացված է։

Հիշեցնենք, որ «Ապօրինի ծագում ունեցող գույքի բռնագանձման մասին» օրենքն ընդունվել է 2020թ. ապրիլի 16-ին և ուժի մեջ մտել նույն տարվա մայիսի 23-ին: Մասնագիտական հանրությունը բազմիցս մտահոգություններ է հայտնել օրենքի առնչությամբ՝ վիճարկելով դրա սահմանադրականության հարցը։ Արդյունքում, ԱԺ ընդդիմադիր պատգամավորների ընդհանուր թվի առնվազն մեկ հինգերորդի դիմումի հիման վրա «Ապօրինի ծագում ունեցող գույքի բռնագանձման մասին» օրենքի՝ Սահմանադրությանը համապատասխանության հարցը քննվում է ՍԴ-ում։

ՍԴ-ն 2022թ․ հուլիսի 8-ին աշխատակարգային որոշում էր կայացրել՝ խորհրդատվական կարծիք ստանալու նպատակով Վենետիկի Հանձնաժողով դիմելու մասին և կասեցրել վարույթը։ Նշենք, որ ՍԴ-ն չորս հարց է հղել Վենետիկի հանձնաժողովին, որոնց վերաբերյալ էլ ստացել է պատասխան, ինչից հետո էլ 2023թ․ հուլիսի 7-ին ՍԴ-ն նախ աշխատակարգային որոշմամբ վերսկսել է վարույթը, ապա՝ նույն օրը մեկ այլ որոշմամբ՝ կրկին կասեցրել։ Այս անգամ ՍԴ-ն հարցեր է ուղղել ՀՀ գլխավոր դատախազությանը, որոնց պատասխանը ստանալուց հետո վարույթը պետք է վերսկսվեր։

Ինչպես պարզվեց՝ դատախազությունը պատասխանել է ՍԴ հարցադրումներին, սակայն վարույթը շարունակում է կասեցված մնալ առ այս պահը։

ՀՀ գլխավոր դատախազությունից «Փաստինֆո»-ի հարցին ի պատասխան հայտնեցին, որ Սահմանադրական դատարանի հարցադրումներին Գլխավոր դատախազությունից պատասխանել են 2023 թվականի սեպտեմբերին:

Փաստացի՝ կարող ենք արձանագրել, որ կասեցման հիմքն այս պահին վերացված է, սակայն ՍԴ-ն չի շտապում քննություն իրականացնել։ Ուշագրավ է, որ այս գործով զեկուցողը ՍԴ դատավոր Վահե Գրիգորյանն է, որն այս պահին մտազբաղ է՝ ՄԻԵԴ ՀՀ դատավոր նշանակվելու տեսլականով, ինչի մասին «Փաստինֆո»-ն հայտնել էր դեռևս ամիսներ առաջ։ Այսօր Գրիգորյանն արդեն թեկնածու է՝ պաշտոնապես։ Վահե Գրիգորյանից բացի ՄԻԵԴ ՀՀ դատավորի հավակնորդներն են՝ փաստաբան Հայկ Ալումյանը, դատավորներ Նորա Կարապետյանը, Լիզա Գրիգորյանը, ԲԴԽ անդամ Վիգեն Քոչարյանը, ի․գ․թ․, դոցենտ Աննա Մարգարյանը, սահմանադրագետ Արմեն Մազմանյանը։

Այս հանգամանքներով պայմանավորված էլ ՍԴ դատավոր Վահե Գրիգորյանի վարույթում գտնվող գործերը մղվել են երկրորդ պլան, սակայն մինչ ՍԴ-ն կքննի գործը և կկայացնի որոշում, ՀՀ գլխավոր դատախազությունն արդեն շուրջ 100 դիմում է ներկայացրել դատարան։ Որևէ մեկով դեռևս որևէ դատավճիռ կայացված չէ, հայցադիմումներից միայն 7-ն է գտնվում բուն դատաքննության փուլում։ Թեև մասնագիտական հանրությունը հակված է կարծելու, որ առաջիկայում դժվար թե ականատես լինենք դատավճիռների՝ նկատի ունենալով օրենքի կարգավորումների խնդրահարույց լինելը, դատարանների վարույթում գտնվող գործերից երկուսով արդեն հաշտություն է կնքվել։ Ասել է թե՝ պատասխանող կողմն ինքնակամ որոշել է համաձայնել և հանձնել դատախազության կողմից վիճարկվող գույքը, ամենայն հավանականությամբ, օր առաջ քաշքշուկներից ազատվելու համար։ Իսկ ինչ է լինելու այդ գույքի հետ, եթե հանկարծ ՍԴ-ն հակասահմանադրական ճանաչտ օրենքը։

Հեղինակ՝ Իզաբել Սահակյան

Աղբյուր` Փաստինֆո