Փաստ ինֆո

Ահաբեկչության մասին խոսք լինել չի կարող։ Այլ անձանց կյանքին սպառնալ չի եղել, իրենք իրենց են վնասել։ Այս մասին «Փաստինֆո»-ի հետ զրույցում ասաց փաստաբան Արայիկ Պապիկյանը։

Հիշեցնենք, որ մարտի 24-ին նռնակով զինված երեք տղամարդ, որոնք, ինչպես պարզվել է հետագայում, «ԱԺԲ» աջակիցներ են, փորձել են ներխուժել Ոստիկանության Նոր Նորքի բաժին։ Ոստիկանության շենքի մոտ նռնակ են պայթեցրել, ինչի հետևանքով նռնակով զինված անձանցից երկուսը բեկորային վիրավորվում են ստացել՝ իրենց իսկ նռնակներից եւ տեղափոխվել են հիվանդանոց։ Երրորդ տղամարդուն վնասազերծել է ԱԱԾ հատուկ նշանակության «Ալֆա» ջոկատը։ Դեպքի առթիվ ախաձեռնվել է քրեական վարույթ ՝ ՀՀ քրեական օրենսգրքի 308-րդ հոդվածի 1-ին մասի (ահաբեկչություն) հատկանիշներով։ Նրանց մեղադրանք է ներկայացվել ՀՀ քրեական օրենսգրքի 308-րդ հոդվածի 1-ին մասով (ահաբեկչությունը) և 335-րդ հոդվածի 2-րդ մասով (խմբի կազմում հրազենի, դրա հիմնական բաղկացուցիչ մասերի, ռազմամթերքի և այլ նյութերի, սարքերի, առարկաների ապօրինի շրջանառությունը) նախատեսված հանցավոր արարքներ կատարելու համար։ Մեղադրյալներից երկուսը կալանավորվել են, մեկը՝ գտնվում է հիվանդանոցում։

Արայիկ Պապիկյանը, անդրադառնալով արարքի որակմանը, նշեց, որ որքանով մամուլից է տեղեկացվել՝ միտք է հնչել, թե «մենք մեզ կպայթեցնենք, տղաներին բաց թողեք», ուստի ահաբեկչության մասին խոսք լինել չի կարող, տարրեր չկան։

«Ուրիշների, այլ անձանց կյանքին սպառնալ չի եղել, իրենք իրենց են վնասել։ Համենայն դեպս՝ այնքանով, որքանով կարողացանք մամուլից ստանալ այդ կցկտուր տեղեկությունները, ահաբեկչության մասին խոսք լինել չի կարող, բայց չեմ զարմանում՝ ռեժիմը ռեպրեսիաների ճանապարհ է ընտրում և կօգտագործի այս առիթը՝ նաև այն անձանց դեմ, որոնք ընդվզման փորձ կանեն՝ անկախ նրանից, թե դա ինչպես կդրսևորվի։ Բոլորին բանտերով կսպառնան, թեև հիմա այնքան մարդկանց են պահում բանտերում։ Մեթոդները կապ չունի իրենց համար։ Պետք է՝ հոդվածը կգտնեն, բանտ կտանեն»,- նշեց Պապիկյանը՝ ավելացնելով․ «Այդ ռեժիմից ազատություն եմ մաղթում»։

Նշենք, որ փաստաբան Արայիկ Պապիկյանն առաջիկայում կներգրավվի գործով՝ որպես պաշտպան։ Փաստաբանը տեղեկություն չունի՝ արդյո՞ք մեղադրյալների մասնակցությամբ քննչական գործողությունների, դատարանում՝ կալանքի նիստերի ընթացքում պաշտպաններ ներկա եղել են, թե ոչ։ Անդրադառնալով ԱԺԲ անդամների տանը՝ դեպքին հաջորդած խուզարկություններին՝ Պապիկյանը նշեց, որ մոտ 20 հասցեներում խուզարկություն է եղել, հիմնականում՝ աջակիցների կամ հետևորդների հասցեներում, անհատ անձինք են։

«Ըստ պաշտոնական հայտարարության՝ այնպիսի բաներ են հայտնաբերել, ինչն արդեն երրորդ օրն է՝ ընդամենն իրենց թողել ծիծաղելի իրավիճակում՝ ինչ-որ սխեմա են գտել՝ փողոցները նկարած՝ հանրապետության Հրապարակում, զինվորական հանդերձանք են գտել, ինչը երևի յուրաքանչյուր հայի տանը կա՝ պատերազմից հետո։ Եթե այդ թղթի վրա գրված բանը սխեմա են համարում, դա իրենց որակն է, երևի կյանքում սխեմա չեն տեսել։ Հայտնաբերված «սարսափելի» բանը 2-3 նռնակ է եղել՝ չգիտեմ որտեղից և ինչ-որ զանգված էին գտել՝ կրկին չգիտեմ, թե որտեղից»,- ասաց Պապիկյանը՝ հավելելով, որ ԱԺԲ գրասենյակում խուզարկություն չի իրականացվել, իսկ պաշտոնական հաղորդագրությունը «սուտ» է․ «Հավանաբար՝ ինչ-որ մեկի տանից ինչ-որ բան գտել են, կամ՝ իրենք դրել են, իրենք էլ՝ հայտնաբերել։ Չեմ վստահում, չեմ հավատում այդ հայտարարությանը։ Իրենք շատ ծիծաղելի են, որովհետև մտնել 20 հասցե և ոչինչ չգտնել, դա ցույց է տալիս իրենց վախերը։ Ես ուզում եմ տեսնել նաև այն դատավորներին, որ 20 հասցե խուզարկության թույլտվություն են տվել, ոչինչ չեն գտել։ Սա ցույց է տալիս, թե ինչքան էժան են։ Շատ ծիծաղելի կլիներ, եթե այսքան ողբալի չլիներ։ Խոսքը պետական ինստիտուտների մասին է՝ դատարանների, ԱԱԾ, ուժային կառույցներ և հանրության դատին են ներկայացրել զավեշտալի, ողբերգական տեսարան»։

Պապիկյանի խոսքով՝ եթե զինվորական հագուստը ներկայացվում է որպես արգելված իրեր, առարկա, ապա ՀՀ բնակչության 80 տոկոսին պետք է քրեական հետապնդման ենթարկել, որովհետև այդպիսի տարրեր առնվազն 80 տոկոսի մոտ կա։ Փաստաբանը, թեև տեղեկություն չունի, բայց չի բացառում, որ օհմ-ներ իրականացված լինեն գործով։

«Չեմ զարմանում, որ դա կատարել են, կատարում են։ Ում համար է գաղտնիք, որ իշխանությունն՝ իրեն ոչ հաճո, իրենց քննադատող քաղաքական գործիչներին հետապնդում են, գաղտնալսում են։ Համոզված եմ՝ հիմա էլ շարունակվում է։ Ռեպրեսիվ մեթոդը վերջին տարիներին շատ բացահայտ է։ Կարծում եմ՝ բոլոր այն անձինք, որոնք հետապնդումների տակ են, իրենք գիտեն, որ շուրջօրյա ապօրինի կամ օրինական հսկողության ներքո են գտնվում»,- ասաց Պապիկյանը։

Ինչ վերաբերում է դեպքի օրը ոստիկանության Մասիվի բաժնի մոտից հիվանդանոց տեղափոխված տղամարդկանց, ապա փաստաբանը հայտնեց, որ Արթուր Մովսիսյանին պատշաճ բուժօգնություն ցուցաբերվել է, վիճակը բավականին լավ է, գիտակցությունը տեղն է, իսկ Վարդգեսի վնասվածքը թեթև էր, հաշվի առնելով առողջական բավարար վիճակը, կալանքի հարցը արդեն լուծել են, չի բացառվում, որ Արթուր Մովսիսյանի խափանման միջոցի հարցը ևս լուծվի առաջիկայում։

Հեղինակ՝ Իզաբել Սահակյան

Աղբյուր` Փաստինֆո