Փաստ ինֆո

Նիկոլ Փաշինյանն, ըստ ամենայնի, փորձում է վարել «0 խնդիր՝ հարեւանների հետ» քաղաքականությունը, ինչը ժամանակին իր գիծն էր հռչակել Թուրքիայի արտգործնախարար Ահմեդ Դավութօղլուն, սակայն ներկա պայմաններում դա շատ վտանգավոր է։ Նման դիտարկմամբ հանդես է եկել միջազգայնագետ Գրիգոր Բալասանյանն՝ ավելացնելով.«Աստված մի արասցե, որ վերածվի 0 հարևան առանց

խնդրի, որովհետև ներկայումս այն հեղհեղուկ իրավիճակը, որ կա տարածաշրջանում չափազանց վտանգավոր է»։

Բալասանյանի դիտարկմամբ՝ հիմա պահը չէ հարևան երկրների հետ սահմանագծում և սահմանազատում իրականացնելու համար։ Նման գործընթացը կատարվում է փոխզիջման հիմքով և կողմերը գնում են որոշակի զիջումների, որպեսզի փրկեն հարաբերությունները կամ հարաբերությունները բարձրացնեն ավելի բարձր մակարդակի։

«Ադրբեջանի պարագայում փոխգործակցության մասին խոսք լինել չի կարող, որովհետև ադրբեջանցիները կարծում են, որ զիջողը միայն Հայաստանը պետք է լինի, այն էլ ոչ թե կոնկրետ քարտեզի հիման վրա,այլ այն ցանկության, որն ունի Ալիևը՝ հնարավորինս շատ տարածք վերցնել Հայաստանից»,- «Փաստինֆո»-ի եթերում ասել է Բալասանյանը։

Այդ համատեքստում նա արդարացված չի համարել նաեւ Վրաստանի հետ սահմանազատման ու սահմանագծման աշխատանքներին նոր շունչ հաղորդելը։ Վրաստանը մեզ համար կարևոր գործընկեր է, այդ երկրում կես մլն հայ է ապրում և Վրաստանով է անցնում դեպի Ռուսաստան տանող միակ ցամաքային ճանապարհը։ «Մեր բարեբախտությունն է նաև, որ Վրաստանը չի միացել ՌԴ դեմ պատժամիջոցներին և չի փակել այդ ճանապարհը։ Սա մենք պետք է օգտագործենք՝ ունենալով Վրաստանի հետ բարեդրացիական հարաբերություններ։ Եթե 30 տարի ապրել ենք առանց սահմանային ճշգրտումների ու եղել է բանավոր համաձայնություն այդ հարցը թողնել սերունդներին, ապա ևս 30 տարի վրացիները և մենք կկարողանանք ապրել այս սահմաններում»,- ասել է Գ. Բալասանյանը։

Մանրամասները՝ տեսանյութում։

Աղբյուր` Փաստինֆո