Փաստ ինֆո

Երևանի նախկին քաղաքապետ Հայկ Մարությանն առաջիկայում կուսակցություն կհիմնի, որը կոչվում է «Նոր ուժ»։ Այսօր տեղի է ունեցել կուսակցության հիմնադրման ազդարարումը, իսկ համագումարը տեղի կունենա մայիսի 1-ին։

Երևանի ավագանու «Ազգային առաջընթաց» խմբակցության անդամ Գրիգոր Երիցյանը «Փաստինֆոյի» հետ զրույցում հայտնեց, որ ինքն անդամագրվել է կուսակցությանը, ավելին, կուսակցության հիմնադիր անդամներից է։ Ավելին, նա նաև նշեց, որ ավագանու 14 հոգանոց խմբակցության բոլոր անդամները, բացառությամբ «Ազգային առաջընթաց» կուսակցության ներկայացուցիչներից, որոնք 4-ն են, ցանկություն են հայտնել անդամագրվելու նորաստեղծ կուսակցությանը։

Այդուհանդերձ, Երիցյանը վստահեցնում է, որ խմբակցության ներսում որևէ խնդիր չունեն։ «Այս որոշումը կայացրել ենք՝ նաև իրենց հետ խորհրդակցելով։ Մենք շարունակելու ենք Երևանի ավագանու շրջանակներում համագործակցությունը, չի բացառվում նաև, որ համագործակցենք խորհրդարանական ընտրություններոււմ՝ որպես դաշինք։ Սա քննարկման ենթակա է, մենք բավական նման գաղափարական հենք ունենք, մեր գործընկերները կուսակցություն հիմնելու մեր որոշումը բավական դրական են ընդունել և ինչպես համագործակցել ենք Երևանում, հնարավոր է համագործակցենք նաև խորհրդարանական ընտրություններին ընդառաջ»,- ասաց Երիցյանը։

Նա նաև ընդգծեց, որ կուսակցության նպատակը հենց ներքաղաքական կյանքին մասնակցելն է, այդ թվում՝ ապագա խորհրդարանական ընտրություններին։

«Մենք քաղաքական միավոր ենք, որ կապված չէ ոչ նախկին, ոչ ներկա իշխանությունների հետ, անկախ, քաղաքական առումով խնդրահարույց կենսագրություն չունեցող մարդկանց խումբ ենք, ովքեր ցանկանում են մեր երկրում բարեփոխումներ իրականացնել։ Մենք կարծում ենք, որ նախկին և ներկա դիսկուրսի արանքում կորում է քաղաքական խոսքը, մենք նաև Երևանի ավագանիում ենք ցույց տվել այդ քաղաքական խոսքը ունենք և շարունակելու ենք նույն ուղղությամբ»։

Դիտարկմանը, թե չնայած պնդում են, որ նախկին ու ներկա իշխանությունների հետ կապ չունենք, այդուհանդերձ քաղաքական դաշտ Մարությանը մուտք է գործել հենց ներկա իշխանության հետ՝ Երիցյանը պատասխանեց, որ կարծում է, հանրության համար էլ հասկանալի է, որ ՔՊ-ի հետ իրենք համագործակցության որևէ եզր չեն տեսնում։ «Երևանու ավագանու օրինակով մենք ցույց ենք տվել, որ իրական ընդդիմություն ենք և կատարում են ընդդիմության մեր գործառույթը։ Այնպես, որ ես մտահոգություն չունեմ, որ մեզ ՔՊ-ի հետ կասոցացնեն։ Կարծում եմ, լայն շրջանակում էլ չկա այդ ընկալումը, չնայած որ որոշ քաղաքական ուժեր փորձեն Մարությանին կապել Փաշինյանի ղեկավարած ուժի հետ։ Ինպես հիշում եք՝ նույն Փաշինյանը Մարությանին փորձում էր կապել նախկին նախագահ Քոչարյանի հետ, բայց դա նույնպես իրականությանը չի համապատասխանում։ Այսինքն, կարծում եմ, որ թե գործող, թե նախկին իշխանությունները կփորձեն որոշակի ֆոն ստեղծել, բայց մենք այս առումով մտահոգություններ չունենք»,- եզրափակեց Երիցյանը։

Աղբյուր` Փաստինֆո