Փաստ ինֆո

Հայաստանում չկա քննարկում Տավուշից որևէ գյուղ հանձնելու մասին։ Այս մասին ԱԺ-ում լրագրողների հետ զրույցում ասել է ԱԺ նախագահ Ալեն Սիմոնյանը։ «Մենք հիմա փնտրտուքի մեջ ենք, փնտրում ենք այն մարդկանց, որոնք համարում են, որ դա Հայաստանի տարածք է, ես ման եմ գալիս այդ մարդկանց, ովքեր կգան և կասեն, որ դա Հայաստանի տարածք է»,- ասելէ Սիմոնյանը։

Հարցին,  եթե քարտեզ չկա, ինչպե՞ս են որոշում, որ դա Հայաստանի տարածք չէ՝ նա պատասխանեց, որ արդեն ասել է, որ Հայաստանը մետր առ մետր կարող է իր տարածքը ցույց տալ։

«Կոնկրետ սահմանի տեղը Հայաստանի Հանրապետությունը գիտի։ Այն մարդիկ, որոնք ապրում են Տավուշում, գիտեն, թե որ գծից այս կողմ է միշտ եղել Հայաստանի Հանրապետություն, և ՀՀ բոլոր իշխանությունները շատ լավ իմացել են, մենք էլ բոլորս շատ լավ իմացել ենք, տեսել ենք այն ճանապարհը, այն կտորը, անգամ ինչ-որ ժամանակ կանգնել՝ ասել ենք՝ այ տես, սա արդեն Ադրբեջան է։ Այնպես որ՝ մենք որևէ նոր բանի մասին չենք խոսում, ես հասկանում եմ, որ ընդդիմությունը հերթական անգամ փորձում է դրա վրա ինչ-որ բան գեներացնել, նախապես ասում եմ, չի ստացվելու»։

Հարցին, թե արդյոք հաշվարկել են վտանգները՝ Սիմոնյանն ասաց, որ այո, հաշվարկել են, ու հենց այդ հաշվարկն է դրված ամեն ինչի հիմքում։ «Երբ Ղարաբաղի պատերազմի մասին խոսակցություններ էին գնում, ու փողոցում տարբեր դուրսպրծուկներ վազվզում էին ու մեզ մեղադրում  հողեր հանձնելու, հետո հողեր չհանձնելու, ժամանակին պատերազմը կանգնեցնելու, հետո չկանգնեցնելու մեջ, մեզ ասում էին՝ ինչու այսպես կամ այնպես չարեցիք, եթե էդպես էր լինելու։ Հիմա տեղի է ունենում գործընթաց, որի անունը Հայաստանի և Ադրբեջանի միջև սահմանի վերականգնում է, այն սահմանի, որն ապացուցված է։ Խոսքը քարտեզի մասին չէ, որ ամեն մեկս մի քարտեզ գծում է, խոսքը մի քարտեզի մասին է, որտեղ կա ստորագրոթյուն Ադրբեջանի կողմից և Հայաստանի կողմից։ Այսինքն, երբ ես ասում եմ, որ գիտենք Իրանից մինչև Վրաստան ընկած մեր սահմանը, ես խոսում եմ իրավաբանորեն, լեգիտիմ հիմքեր ունեցող քարտեզի մասին»,- ասել է Ա. Սիմոնյանը։

Հարցին, թե կա՞ երաշխիք, որ ադրբեջանցիներն էլ դուրս են գալու Հայաստանի օկուպացված տարածքներից՝ նա նշեց, նման երաշխիքների մասին չի կարող խոսել։ «Բնական է, որ այդ ամենը պետք է հայելային տրամաբանության մեջ դնեն, բայց այդ կետը, որտեղից պետք է սահմանը ուրվագծվի, արդեն ակնհայտ է, որ ճիշտը Տավուշից սկսելն է, որովհետև այնտեղ վիճելի մասերը ավելի քիչ են, քան մնացած տեղերում։ Այդ պրոցեսի միջոցով մենք կարող ենք ունենալ ամբողջական սահմանի ուրվագիծ»։

Աղբյուր` Փաստինֆո