Փաստ ինֆո

Ոսկեպարում էլ են խաբելու, հանելու են ժողովրդին։ «Փաստինֆո»-ն հետ զրույցում մտահոգ ասաց Շուռնուխի նախկին գյուղապետ Հակոբ Արշակյանը։

«Էն ժամանակ, որ ասում էինք, գոռում, աղաղակում՝ եկե՛ք, օգնե՛ք, միասի՛ն ըլենք, ով զենք ա ստացել, թող գա, եկան մի քանի հոգի։ էլի մալադեց նրանց, որ եկան, բայց արդյունքում ոչ մի բան։ Մինչև տղեքը Գորիսից հասան՝ արդեն մեր զորքերը հանեցին, մնացին միայն մեր գյուղի տղաները։ Ինչ եմ ուզում ասեմ, զոհ դարձանք, էլի», - 2020 թվականի իրադարձությունները վերհիշում է Հակոբ Արշակյանը։

Այս տարիների ընթացքում գյուղում ոչինչ չի փոխվել, նույն վիճակն է, ինչը ստեղծվեց 2020 թ-ի դեկտեմբերին, երբ գյուղ մուտք գործեցին այդ այլազգիները։ «Սենց մի պատմություն կա,- ասում է Շուռնուխի նախկին գյուղապետն ու ավելացնում,- գորիսեցի մի վարորդ կար, գնացել էր Սև ծով՝ հանգստանալու։ Մի ցիլինդր էր հետը բերել, դրել գլխին ու գնացել գործի, սաղ վարորդներն ասել են , թե չի սազում, շուռ էր եկել թե՝ «էնքան դնիլ տեմ, աչքները սվորի, ասեն՝ սազում ա։ Հիմա մեր ժղովրդի վիճակն է, էլի, էնքան ադրբեջանցի են տեսել, որը աչքները սովորել ա։ Հավատացնում եմ։ Էտ նույն էլ ընդեղ ա կատարվելու»,- ասաց Արշակյանը՝ նկատի ունենալով Տավուշը։

Գյուղի կեսը թշնամուն հանձնելու ՀՀ քաղաքական իշխանության որոշումից հետո Շուռնուխում, կարելի է ասել, այլեւս անասնապահությամբ չեն զբաղվում։ «Ոնց ասեմ, անասնապահությունը պրծած ա։ Ունենք 2, 3 հոգի, որ անասնապահությամբ զբաղվում են, մնացածը՝ վերացրին։ Էտ անասունները վերացրեցին, որովհետեւ բաց էին թողնում, դե դրանք էլ սովոր են իրենց արտերին, արածելով անցնում էին թուրքի կողմը, իրենց գետն ա, ջուրը խմում։ Էն անասունները, որի անցնելը կամերայով ֆիքսած չէր, հնարավոր չէր լինում հետ բերել, թուրքերն ասում էին կգտնենք, բայց հո չէին գտնում, որ հետ տան»,- ասաց նախկին գյուղապետը։ Ըստ նրա՝ ռուս սահմանապահների միջոցով հաջողվում էր վերադարձնել միայն այն անասուններին, որոնց այն կողմն անցնելը հնարավոր լինում էր ապացուցել տեսագրությունների միջոցով։

«Տենց մի քանի դեպք եղան՝ անասունները անցել էին, թուրքի կողմը, հետ չտվեցին, ապացուցվածը՝ հետ տվի ։ Էնա, ապրեն եզդիները, եկան կես գնով անասուններին առան տարան։ Մարդիկ համարեցին, որ ավելի լավ ա կես գնով եզդիներին տան, ծախեն, քան գնա նվեր ըլի թուրքին։ Իսկ հողագործությունը, ամեն մեկն իր տնամերձով յոլա է գնում»,- նշեց Արշակյանը։

Կառավարության խոստացած 13 տունը դեռ շահագործման չի հանձնվել։ Նշենք, որ դրանք նախատեսված որպես փոխհատուցում այն բնակիչներին, որոնց սեփականությունը իշխանությունները հանձնեցին թշնամուն, սակայն նրանք դեռ իրենց հիմնական օթեւանը չունեն։ «Փաստինֆո»-ն ավելի վաղ հայտնել է, որ այդ տները ապահովված չեն ջրով։

«Ասում են ջուր լինելու ա, բայց ստում են»,- նկատեց Հ. Արշակյանը, որը 2023 թվականի հոկտեմբերից այլեւս գյուղապետ չէ։ Ըստ նրա՝ շատ քիչ քանակությամբ ջուր, ինչպես Արշակյանն է ասում՝ մի տան ջուր, 3 կմ ինքնահոսով բերել, հասցրել են գյուղը, որի ընթացքում «ընկեր կառավարությունը» եկավ, հայտնաբերեց, որ ջրագիծն արդեն կառուցվում է , ասեց, որ Շուռնուխի ջրի հարցը լուծել են։Մինչդեռ, ինչպես նշեցինք, դա միայն մի տան ջրի ծավալն էր ապահովում։ «Թաթը դրավ իրան վրա ու ասեց՝ ըհըն, Շուռնուխի ջրի հարցը լուծվեց, գումարած 13 տան ջուրը, ապահովվեց , բացի էտ, հըլա գյուղինն էլ ա ապահովում, բայց լրիվ՝ սուտ։ Էդ վարչապետը, որ կա, եկավ ստեղ։ Էդ վարչապետին ասի, որ դա չի բավականացնելու ու դրանից 2 օր հետո ես հրաժարական տվեցի, էլ չեմ աշխատում, հոկտեմբերից չեմ աշխատում»,- ասաց Հակոբ Արշակյանը՝ լրագրողներին առաջարկելով մի անգամ այցելել իրենց։

Նշենք, որ սահմանամերձ դարձած այդ տարածք լրատվամիջոցների մուտքը հատուկ թույլտվությամբ է արդեն, ինչպես այսօր սկսել են սահմանափակել նաեւ մարդկանց մուտքը՝ Ոսկեպար։

Աղբյուր` Փաստինֆո