Փաստ ինֆո

Արգելվա՞ծ է արդյոք հայկական կոնյակի ներմուծումը, Բելառուս ամբողջ ծավալով և արդյոք դա վերաբերվում է բոլոր տեսակի հայկական արտադրանքներին։ Ի՞նչ խնդիր է ծագել։ Հաշվի առնելով երկուշաբթի տարածված նման լրատվությունը՝ «Փաստինֆոն» կապ հաստատեց Երևանի «Արարատ» կոնյակի գործարանի հասարակայնության հետ կապերի բաժնի հետ։ «Արարատ» կոնյակի գործարանի մամլո պատասխանատու մենեջեր Զարուհի Սարիբեկյանը տեղեկացրեց, որ Բելառուսի առողջապահության նախարարությունն արգելել է Արարատի մարզում շշալցվող մեկ այլ արտադրանքի ներմուծում, որը բացարձակ կապ չունի իրենց անվանական խմիչներից ոչ մի տեսակի հետ։

Լուրը չի վերաբերվում Երևանի «Արարատ» կոնյակի գործարանի արտադրանքին, այն չի վերաբերվում նաև Հայաստանի այլ գինու և կոնյակի գործարանների արտադրանքին, պարզապես Արարատի մարզի անունը լրատվության մեջ ասոցացվել է «Արարատ» Կոնյակի գործարանի անվան հետ ։

Հիշեցնենք, որ երկուշաբթի հայկական լրատվամիջոցներում տարածվել էր լուր, որ Բելառուսի առողջապահության նախարարությունն արգելել է «Արարատի կոնյակի գործարանի արտադրանքի» ներմուծումը, իրացումը, պահպանումն ու տարանցումը։ Համապատասխան հաղորդագրությունը հրապարակված է եղել «Գոմելի հիգիենայի, համաճարակաբանության և հանրային առողջության տարածաշրջանային կենտրոն» պետական հաստատության պաշտոնական կայքէջում։ Հրապարակման մեջ նշված էր եղել, որ «Այրում» նռան գինու բաղադրության մեջ հայտնաբերվել է սինթետիկ ներկանյութ՝ ազորուբին։ Արտադրանքի ներմուծման և իրացման արգելքի պատճառը դարձել է սխալ մակնշումը, սննդային արտադրանքի տվյալների կեղծումը։ Առողջապահության նախարարության որոշմամբ՝ ամբողջ խմբաքանակը պետք է հանվի առևտրից ու ոչնչացվի կամ հետ ուղարկվի։

Աղբյուր` Փաստինֆո