Փաստ ինֆո

Ամբակում Գրիգորյանի՝ ՔԿԾ պետի պաշտոնում նշանակումը՝ վեճի առարկա։ ԱԺ պետա-իրավական հարցերով հանձնաժողովի նիստը լարված մթնոլորտում է անցել։ Անդրանիկ Քոչարյանը, դիմելով ԱՆ նախարար Գրիգոր Մինասյանին, նախ բարձրացրեց ՔԿՀ-ներում տիրող իրավիճակը՝ նշելով, որ գաղտնիք չէ՝ ՔԿՀ-ների և՛ ներսում, և՛ դրսում հսկայական միջոցներ են պտտվում և պետք է նայել՝ այդ միջոցներներն ինչպես են պտտվում՝ թմրանյութերի, հեռախոսների, մյուսների միջոցով։ Քոչարյանը նշեց, որ ցանկանում է՝ ՔԿՀ-ներում բարեփոխումները հաջողեն, բայց նախարարը դրա համար պետք է ունենա լավ թիմ։

«Ես ուզում եմ Դուք հաջողեք, դրա համար պետք է ներդաշնակված աշխատեք բոլոր կառույցների հետ, որովհետև Դուք էլ եք անփորձ այդ համակարգի նկատմամբ։ Ես ավելի փորձառու եմ, քան Դուք, որովհետև ժամանակին ղեկավարել եմ ամբողջական այդ կառույցը։ Դուք հիմա բարեփոխումներ պետք է անեք, բայց անելու համար պետք է ունենաք որակյալ թիմ, իսկ թիմի հարցում կարող եք ունենալ նաև մեր աջակցությունը, և բոլորի աջակցությունը, նույնիսկ՝ մեկուսարանում նստածների, որովհետև ամենամեծ ինֆորմացիան իրենցից պետք է ստանանք, թե իրենց կյանքը ոնց է դրսևորվում»,- ասաց Անդրանիկ Քոչարյանը։

Պատգամավորի հրապարակավ հայտնած դժգոհությունը հատկապես վերաբերում էր Ամբակում Գրիգորյանի նշանակմանը։

«Երբ մեր գործընկեր Սերգեյ Ատոմյանը նշանակվում էր ՔԿԾ տնօրեն, մենք մտածում էինք, որ սկսում ենք բարեփոխումների մի լայնածավալ գործընթաց, բայց երբ Ամբակում Գրիգորյանը նշանակվեց խորհրդական, ինձ մոտ մեծ զարմանք առաջացավ այն առումով, որ ես լինելով Փաստահավաք խմբի անդամ, շատ լավ գիտեի, թե քննչական խումբը ինչ գործունեություն է ծավալել «Մարտի 1»-ի գործերով և տվյալ քննիչը, որը Վահագն Հարությունյանի ամենակարևոր քննիչներից մեկն է եղել, ընդ որում, քննչական խմբի ղեկավար Վահագն Հարությունյանը մինչ այժմ շարունակում է փախած մնալ, ՀՀ-ից դուրս է, Ամբակում Գրիգորյանը խորհրդականից դարձավ տեղակալ, հետո արդեն ծառայության ղեկավար: Հիմա դրանով մենք մարտի 1-ի էջը փակո՞ւմ ենք, թե՞ բաց ա: Էդ դեպքում բոլոր քննիչները, որ այս գործերով ունեցել են մասնակցություն, իրենք պետք է մանրամասն ուսումնասիրվեն նշանակումներից առաջ»,- հայտարարել է Քոչարյանը:

Գրիգոր Մինասյանն էլ արձագանքել է՝ իր նշանակումներին պետք է վստահել, փորձառու կադրերը, այսպես թե այնպես, նախկինում աշխատել են։

«Այստեղ միակ խնդրանքս է, որ վստահեք նշանակումների մասով, թեկուզ Ձեզ հետ չհամաձայնենք, մերժենք։ Այստեղ կարևոր է, որ հնարավորություն տաս ՔԿՀ-ներին իրենց թիմը ձևավորեն։ Եթե նույնիսկ ունենք նախասիրություններ, կամ մարդիկ, ովքեր ուզում են այս կամ այն տեղում հայտնվել և մերժումներ կստանան՝ ես էլ, Դուք էլ դա անձնական չհամարենք, այլ համարենք, որ ինստիտուցիոնալ բարեփոխումների համար է»,-ասաց նա։

Քոչարյանն արձագանեք՝ այս դրվագն իրեն հուշեց, որ նախարարին սխալ բաներ են հուշել։

Աղբյուր` Փաստինֆո