Փաստ ինֆո

ՆԳՆ ոստիկանության Նոր Նորքի բաժնում ահաբեկչության գործով խուզարկություններ են իրականացվում։ Այս մասին «Փաստինֆո»-ն տեղեկանում է ՀՀ ՔԿ-ից։

Հիշեցնենք, որ երեկ նռնակով զինված տղամարդիկ փորձել են ներխուժել Ոստիկանության Նոր Նորքի բաժին։ Ոստիկանության շենքի մոտ նռնակ են պայթեցրել, ինչի հետևանքով նռնակով ներխուժման փորձ կատարած երեք տղամարդկանցից երկուսը բեկորային վիրավորվում են ստացել՝ իրենց իսկ նռնակներից։ Վերջիններս տեղափոխվել են հիվանդանոց։ Երրորդ տղամարդուն վնասազերծել է ԱԱԾ հատուկ նշանակության «Ալֆա» ջոկատը։ Տղամարդուն վնասազերծելուց անմիջապես հետո տեղափոխել են բաժին՝ հարցաքննության, նա ձերբակալվել է։ Դեպքի առթիվ ախաձեռնվել է քրեական վարույթ ՝ ՀՀ քրեական օրենսգրքի 308-րդ հոդվածի 1-ին մասի (ահաբեկչություն) հատկանիշներով։

ՀՀ ՔԿ-ից «Փաստինֆո»-ի հետ զրույցում հայտնեցին, որ Ոստիկանության Նոր Նորքի բաժնում մարտի 24-ին կատարված առերևույթ ահաբեկչության դեպքի առթիվ նախաձեռնված քրեական վարույթի շրջանակում ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչության կողմից կատարվում են մեծածավալ անհետաձգելի գործողություններ, արդ թվում կատարվում են խուզարկություններ Ոստիկանության ու ԱԱԾ-ի օժանդակությամբ։

Այլ մանրամասներ՝ արդյո՞ք մեղադրանք ներկայացվել է տղամարդուն, հարցաքննվել են արդյո՞ք նռնակով ներխուժման փորձ կատարած մյուս երկու տղամարդիկ, որոնք այժմ հիվանդանոցում են՝ ՔԿ-ից չմանրամասնեցին՝ նշելով․«Նախաքննությունը շարունակվում է, այս պահին հավելյալ տեղեկատվություն չեմ կարող տրամադրել»։

Հեղինակ՝ Իզաբել Սահակյան

Աղբյուր` Փաստինֆո