Փաստ ինֆո

Նման ահաբեկչական գործողությունները իշխանություններին լեգիտիմ հնարավորություն են տալու բռնաճնշումների թափանիվը ավելի արագ գործի գնել։ Այս մասին «Փաստինֆո»-ի հետ զրույցում ասաց քաղաքական վերլուծաբան Արմեն Բաղդասարայանը՝ անդրադաենալով հարցին, թե արդյոք օրեր առաջ ՔՊ-ականների տների կամ գրասենյակների մոտ ռումբերի տեղադրման ահազանգերն ու նախօրեին Նոր Նորքի ոստիկանական բաժանմունքի վրա հարձակումը կարելի է դիտարկել միևնույն շղթայի տրամաբանության ներքո։

«Թե որքանով են այդ իրադարձությունները միևնույն շղթայի մաս՝ չեմ կարող ասել, գուցե այդպես է, բայց փաստեր նման բան պնդելու համար չկան։ Այլ հարց է, որ քաղաքական բազմաթիվ ուժեր ՀՀ ներսում և դրսում կցանկանային վիճակը ապակայունացնել։ Սա միայն ենթադրություն է, փաստեր ես չունեմ»,- նշեց Ա. Բաղդասարյանը։

Հարցին, թե հնարավո՞ր է այս քայլերով փորձ է արվում հանրապետությունում ստեղծել այնպիսի իրավիճակ, որ իշխանությունը, Տավուշի շուրջ ստեղծված իրավիճակի ֆոնին, հնարավորություն ունենա արտակարգ դրություն հայտարարելու, արգելելու հանրային հավաքները, որպեսզի ճնշի հանրային ընդվզումը՝ վերլուծաբանը արձանագրեց, որ եթե իշխանությունը մտադրվել է միակողմանի զիջումներ անել Տավուշի ուղղությամբ, հետագայում նաև այլ ուղղություններով, ապա պետք է փորձի երկրում ռեպրեսիաների նոր ալիք բարձրացնել, վախեցնել, ահաբեկել, որպեսզի հանկարծ բողոքի մեծ ալիք չբարձրանա։ «Իհարկե, դա հասկանալի է, բայց եթե անգամ բողոքի ալիք բարձրանա, որևէ նման արգելք չի խանգարելու, այսինքն, դա իրականում ձևական բան է, և եթե 50 000 կամ 100 000 մարդ մտադրվի դուրս գալ փողոց՝ ոչ մի արգելք չի խոչընդոտի»։

Ինչ վերաբերում է ահաբեկչական գործողություններին, ապա նա փաստեց, որ չի կարծում, թե դա երկրում հարցեր լուծելու լավագույն ձևն է։ «Ավելին, կարծում եմ, որ դա անընդունելի, քանի որ ուժի կիրառմամբ իշխանության եկած ցանկացած ուժ երկիրը տանելու է նոր ցնցումների ու դրանից օգուտ չի լինելու։ Այսինքն, ցանկացած պարագայում պետք է բացառել նման մեթոդներով իշխանության գալը, որքան էլ արդարացի լինի իշխանությունների հեռացնելու պահանջը և իշխանությունների նկատմամբ եղած դժգոհություները։

Ավելին՝ հաշվի առնելով իշխանությունների գահավիժող վարկանիշը, ընդհանուր անվտանգային իրավիճակը, կարծում եմ, կա իշխանություններին լեգալ ճանապարհով հեռացնելու հնարավորությունը։ Կարծում եմ ՝ կա նաև հասարակությանը այդ գաղափարի շուրջ համախմբելու պոտենցիալը»,- նշեց Բաղդասարյանը։

Անդրադառնալով շրջանառվող տեղեկություններին, թե ահաբեկչության հեղինակները ուղղորդվում էին հենց իշխանությունների կողմից՝ նա պատասխանեց, որ ծանոթ է նման կարծիքների, բայց չի կարող նման պնդում անել, քանի որ նախ փաստեր պետք է ունենա, դրանում գուցե կա տրամաբանություն, բայց այդ հարցերում ենթադրություններով չի կարող առաջնորդվել։

Անդրադառնալով 2018-ին իշխանության գալուց հետո՝ ՊՊԾ գնդի գրավման և ոստիկանների սպանության մեջ մեղադրվող «Սասնա ծռերի» անդամներին կալանքից ազատ արձակելուն, իսկ նախօրեի իրադարձությունները փոխքաղաքապետ Արմեն Փամբուխչյանի կողմից ահաբեկչություն որակելուն, ապա Ա.Բաղդասարյանը նշեց, որ ԱԺԲ-ին լուրջ քաղաքական ուժի չի համարում։ «Սա այն ուժը չէ, որ կարող է սահմանադրական ճանապարհով հավակնել իշխանության։

Ինչ վերաբերում է իշխանությունների տարբեր ժամանակներում տարբեր գնահատականներին, ապա քաղաքական իշխանությունն առաջնորդվում է քաղաքական նպատակահարմարությամբ՝ թքած ունենալով օրենքի վրա էլ, օրենքի առաջ բոլորի հավասարության վրա էլ, ընդհանրապես, իրավական նորմերի վրա էլ։ Սա իշխանորթյունների գործելաոճն է՝ այս պահին հարմար լինի՝ այսպես կվարվեմ, հաջորդ պահին այլ կերպ հարմար կլինի՝ մեկ այլ կերպ կվարվեմ»,- եզրափակեց Բաղդասարյանը։

Աղբյուր` Փաստինֆո