Փաստ ինֆո

ՆԳՆ ոստիկանության Նոր Նորքի բաժին նռնակներով մուտք գործելու փորձ կատարած անձինք «Ազգային ժողովրդավարական բևեռի» համակիրներ են։ Տեղեկությունը «Փաստինֆո»-ի հետ զրույցում հայտնեց ԱԺԲ խորհրդի անդամ Վահե Գասպարյանը՝ նշելով, որ երեքն էլ պատերազմի մասնակիցներ են։

Նրանցից Արթուր Մովսիսյանը որդեկորույս հայր է, ում որդին զոհվել է 44-օրյա պատերազմի ժամանակ։

«Ինքնաբուխ, հուսահատ քայլ են արել՝ այս իրավիճակով պայմանավորված»,- ասաց Գասպարյանը՝ այլ մանրամասներ չհաղորդելով։

Հիշեցնենք, որ երեկ նռնակով զինված տղամարդիկ փորձել են ներխուժել Ոստիկանության Նոր Նորքի բաժին։ Ոստիկանության շենքի մոտ նռնակ են պայթեցրել, ինչի հետևանքով նռնակով ներխուժման փորձ կատարած երեք տղամարդկանցից երկուսը բեկորային վիրավորվում են ստացել՝ իրենց իսկ նռնակներից։ Վերջիններս տեղափոխվել են հիվանդանոց։ Երրորդ տղամարդուն վնասազերծել է ԱԱԾ հատուկ նշանակության «Ալֆա» ջոկատը։ Տղամարդուն վնասազերծելուց անմիջապես հետո տեղափոխել են բաժին՝ հարցաքննության, նա ձերբակալվել է։ Դեպքի առթիվ ախաձեռնվել է քրեական վարույթ ՝ ՀՀ քրեական օրենսգրքի 308-րդ հոդվածի 1-ին մասի (ահաբեկչություն) հատկանիշներով։

ՔԿ-ից ավելի վաղ մեզ հետ զրույցում հայտնել էին, որ նշված քրեական վարույթի շրջանակներում կատարվում են մեծածավալ անհետաձգելի գործողություններ, ադդ թվում կատարվում են խուզարկություններ՝ Ոստիկանության ու ԱԱԾ-ի օժանդակությամբ։

Զինված անձինք, սպառնալով պայթեցնել ոստիկանության բաժինը, որեւէ պահանջ չեն ներկայացրել։

Հեղինակ՝ Իզաբել Սահակյան

Աղբյուր` Փաստինֆո