Փաստ ինֆո

Քանաքեռի Սուրբ Հակոբ եղեղեցու շուրջ Ծաղկազարդի այս կիրակի մի փոքր անսովոր է ։ Լսվում է նաև արցախյան բարբառ։ Երևանի Քանաքեռ -Զեյթուն համայնքում արցախցիներ շատ են հաստատվել։ Զաքարիա Քանաքեռցի կամ Սարկավագի փողոցի կենտրոնական հատվածում խանութներ կան, որտեղ արցախցիներ են աշխատում կամ հենց իրենք են տեղ վարձել ու առևտրի կետ են աշխատեցնում։

Մի հացի փուռ է բացվել , նաև Քանաքեռի ռուսական եկեղեցու մոտ, ուր հացը թխելուց առաջացած ջերմությանը գումարվում է մարդկայինը։ Այստեղ արցախյան բարբառով են խոսում իրար հետ ու հաճախորդին էլ այդպես խոսք ու զրույցով արցախյան կոլորիտը մեջը խառնած ճանապարհում ։ Դրանից մի փոքր վերև բանջարեղենի խանութ էլ կա , հադրութեցիների ընտանիք է աշխատեցնում, էստեղ էլ հախ ու հաշիվը , ընտրությունը բարբառով է ու մի տեսակ ձգող ուժ ունի փոքրիկ այդ տարածքը , թեև կողքին ևս երկու նման վաճառակետ կա, բայց առևտուր անողի ոտքերն այս կողմ են բերում։ Հենց դա է պատճառը , որ Ծաղկազարդին Սուրբ Հակոբի տարածքում այս տարի մի փոքր անսովոր է։

Սուրբ Հակոբը Գանձասարին, Ղազանչեցոցին նման չէ , նման չէ Ամարասին կամ կործանված Կանաչ ժամին , բայց առաքելական է ու Ծաղկազարդին այս եկեղեցում աղոթքը նաև վերադարձի համար է արվում։ Իհարկե եղեղեցու բակում ուռենու ճյուղերի պակաս չկա, այդ մեկը չի փոխված , փոխված են դեմքերը ։ Երեխաներից բացի մյուսների

դեմքերին մտահոգություն կա ու տոնական ժպիտի պակաս կա ։ Սա առաջին Ծաղկազարդն է Արցախի ամբողջական հայաթափումից հետո ու եկեղեցական մեր ժառանգության ու ընհանրապես վերադարձի համար աղոթքն այս թաղամասում բնակվող արցախցիներից շատերը Սուրբ Հակոբում են անում ։

Աղբյուր` Փաստինֆո