Փաստ ինֆո

Գեղարքունիքի մարզի ընդհանուր իրավասության դատարանում՝ դատավոր Վարդան Հարությունյանի նախագահությամբ, այսօր կայացել է Ազատ գյուղի զորամասի զինվորական կացարանում ողբերգական հրդեհի գործով դատական նիստը։

Դատալսումներն անցել են լարված մթնոլորտում։ Մեղադրյալներից Մառլեն Սարգսյանը, որի նկատմամբ նախորդ նիստին դատական սանկցիա է կիրառվել, որով սահմանափակվել էր նրա մասնակցությունը երկու նիստին, այսօր չի ներկայացել։ Նախագահողը նշեց, որ Մառլեն Սարգսյանը չի ներկայացել՝ քննարկելու սանկցիան վերացնելու հարցը, ինչի դեմ էլ Սարգսյանի պաշտպանն առարկեց՝ նշելով, որ իր պաշտպանյալը ցանկացել է ներկայանալ նիստին, սակայն կիրառված սանկցիայով պայմանավորված՝ չի ներկայացել։ Մառլեն Սարգսյանը նաև տեղեկացված չի եղել, որ այսօր պետք է ներկայանար՝ սանկցիան վերացնելու հարցի քննարկման համար, ավելին, ՔԿՀ-ից հայտնել են, որ դատարանի աշխատակազմից են զանգել և հայտնել սանկցիայի մասին։ Դատարանը քննարկման առարկա դարձրեց Սարգսյանի բացակայության հիմքով նիստը հետաձգելու հարցը, ինչը լարվածություն առաջացրեց ծնողների շրջանում։ Արդյունքում՝ սանկցիա կիրառվեց երկու ծնողի նկատմամբ։ Սարգսյանի պաշտպանը նաև դատավորին բացարկի միջնորդություն է ներկայացրել, ինչը մերժվել է։ Հաջորդիվ՝ դատարանում քննարկման առարկա է դարձվել մեղադրյալ Գոռ Աղեկյանի խափանման միջոցի հարցը։ Պաշտպանները միջնորդել են՝ Աղեկյանի նկատմամբ որպես խափանման միջոց կիրառված կալանավորումը փոխել և կիրառել գրավով, տնային կալանքով և բացակայելու արգելք հաակցված խափանման միջոցները։ Պաշտպանության կողմի պնդմամբ՝ Աղեկյանի նկատմամբ կիրառվող կալանքն այլևս պատիժ է։ Դատարանը որոշեց երկարացնել Աղեկյանի կալանքի ժամկետը։

Հիշեցնենք, որ ողբերգական դեպքը տեղի է ունեցել հունվարի 19-ին՝ ժամը 01.30-ի սահմաններում, որի հետևանքով զոհվել է 15 զինծառայող, երեքը՝ տեղափոխվել Այրվածքաբանության ազգային կենտրոն, նրանցից երկուսը, այդ թվում, կապիտանը՝ տևական ժամանակ վերակենդանացման բաժանմունքում են գտնվել։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավելի անձի մահ։ Քրեական վարույթի շրջանակներում որոշումներ են կայացվել տուժող ճանաչելու մասին։

Դեպքի առթիվ նախաձեռնվել է նաև մեկ այլ առանձին վարույթ՝ ՀՀ քրեական օրենսգրքի 550-րդ հոդվածի 3-րդ մասով՝ զինվորական պաշտոնեական անփութության հատկանիշներով, որն անզգուշությամբ առաջացրել է մարդու մահ։ Նշված քրեական վարույթը միացվել է մայր գործին, համատեղ քննություն է իրականացվում։ Քրեական գործով այս պահին արդեն կա 4 մեղադրյալ, որից երկուսը կալանքի տակ են։ 4-րդ մեղադրյալը կապիտանն է, որն, ըստ Ն. Փաշինյանի կողմից կառավարության նիստում շրջանառության մեջ դրված վարկածի, փորձել է ավտոբենզինով վառել վառարանը։ Կապիտանը, ինչպես հայտնի է եւս այրվածքներ էր ստացել ու տևական ժամանակ գտնվում էր հիվանդանոցում, իսկ տուժող կողմը սկսել էր սեփական հետաքննությունն իրականացնել՝ չվստահելով պաշտոնական վարկածին։ Քրեական գործով ընդհանուր առմամբ հինգ մեղադրյալ կա։ Գործն այժմ գտնվում է Գեղարքունիքի մարզի ընդհանուր իրավասության դատարանի դատավոր Վարդան Հարությունյանի վարույթում։ Գործով այդպես էլ չի պարզվել, թե ինչու զինվորները չեն կարողացել դուրս գալ բռնկված կացարանից։

Հեղինակ՝ Իզաբել Սահակյան

Աղբյուր` Փաստինֆո