Փաստ ինֆո

Նիկոլ Փաշինյանի իրավապահները, որոնք վաղուց են լծվել` Փաշինյանի նեղ, խմբակային շահերի սպասարկմանը՝ մոռանալով Հայաստանի պետական շահերը, շարունակում են իրենց հովանու ներքո վերցնելով ադրբեջանական ռազմական հանցագործներին:

Այս անգամ ՀՀ իրավապահները, առավել ճշգրիտ` ՆՓ-ի ՔԿ-ն ստանձնել է Ադրբեջանի պաշտպանությունը` թաքցնելով վերջիններիս ռազմական հանցագործությունները, հայ ռազմագերիների նկատմամբ խոշտանգման դեպքերը: Թերևս չի բացառվում, որ սա հետևանք է` ՀՀ պետական կառավարման ղեկին գտնվող անձանց կողմից Ադրբեջանին ամեն կերպ մաքրելու քաղաքականության, ինչի մասին ևս մեկ անգամ համոզվեցինք բոլորովին վերջերս, երբ պաշտոնական մակարդակով հայտնի դարձավ ՀՀ-ի կողմից` Ադրբեջանի դեմ ներկայացված հայցերից հրաժարվելու հարցը` բանակցային սեղանին դրված լինելու մասին և, ըստ էության, այժմ ՔԿ-ն կոծկում է, փորձում է մոռացության մատնել Ադրբեջանի կողմից կատարված ռազմական հանցագործությունները։

Մասնավորապես, «Փաստինֆո»-նդեռևս 2023թ.դեկտեմբերի 26-ին գրավոր հարցում էր ուղարկել ՔԿ` պարզելու, թե արդյո՞ք պարզվել են 2023թ դեկտեմբերի 13-ին ադրբեջանական գերությունից հայրենադարձված 32 հայերի գերեվարման հանգամանքները, արդյոք վարույթ նախաձեռնվել է նրանց նկատմամբ Ադրբեջանում կիրառված բռնությունների, ֆիզիկական և հոգեկան տառապանք պատճառելու դեպքերով:

Հարցման պատասխան, թեև ստացվել է, սակայն որևէ հոդաբաշխ պարզաբանում չի տրվել, միայն նշվել է, որ ադրբեջանական գերությունից վերադարձած 32 անձանցից 26-ը որպես տուժող են ճանաչվել: Վերադարձած անձանցից 5-ը ՀՀ ՔԿ ԶՔԳՎ կառուցվածքային ստորաբաժանումներում իրականացվող մի շարք վարույթների շրջանակներում ևս տուժող են ճանաչվել, թե ինչու են նրանք այլ գործերով տուժող ճանաչվել, ուր է մնացել 32-րդ գերին եւ ընդհանրապես՝ տուժող են ճանաչվել Բաքվում կիրառված խոշտանգումների համար, թե ոչ։ Այսինքն՝ հաստատվե՞լ է, որ այնտեղ բռնություն է գործադրել։ Ոչ մի պատասխան։

Ընդ որում, այս հարցերի պարզաբանման համար եւս երկու անգամ հարցում ենք ուղարկել ՔԿ, սակայն այս կառույցի պաշտոնյաները, իրենց վեր դասելով Սահմանադրությունից, գործող օրենսդրությունից, ոչ մի պատասխան չեն ուղարկել։

Նկատենք, որ նախկինում փորձ արվում էր պատասխաններ տալ, գոնե տպավորություն ստեղծել, թե շահագրգռված են քննություն իրականացնելու հարցում, իսկ հիմա ընդհանրապես որոշել են չխոսել Բաքվի ռազմական հանցագործությունների մասին։ Այս կառույցը խնդիր է դրել վարկաբեկել միայն հայոց բանակի զինծառայողներին, նրան ներկայացնել որպես դասալիքներ, իսկ ադրբեջանցիների վայրագությունների, մարդկության դեմ ուղղված հանցագործությունների մասին լռում են։ 2023 թ. դեկտեմբերին, 2024 թ. հունվարին ուղարկված հարցումների պատասխանները չստանալով՝ կարծում էինք գործ ունենք որոշ չինովնիկների կամայականության հետ, իսկ հիմա, երբ Փաշինյանը հայտարարեց Ադրբեջանի դեմ ներկայացված հայցերից հրաժարվելու մտադրության ու հավանականության մասին, ամեն ինչ ընկավ իր տեղը. Ն.Փ.-ի ՔԿ-ն եւս լծվել է հայադավ քաղաքականությանը։

Աղբյուր` Փաստինֆո