Փաստ ինֆո

ՔՊ-ականներն այդպես էլ չեն հստակեցնում՝ Տավուշի մարզի հատվածում գյուղերն Ադրբեջանին հանձնելու դիմաց արդյո՞ք Բաքուն կվերադարձնի Բերքաբերի այն հատվածները, որոնք գտնվում են Բաքվի վերահսկողության ներքո՝ փաստացի ևս մեկ անգամ ապացուցելով, որ բոլոր զիջումները ՀՀ-ի կողմից միակողմանի են։

Մասնավորապես, Փաշինյանը երեկ հայտարարել է, որ չկան համաձայնեցված քարտեզներ՝ սահմանազատման-սահմանագծման համար։ Նա նշել էր, թե պատրաստ են ամբողջական սահմանազատում իրականացնել՝ ՀՀ Բաղանիս-Ոսկեպար-Կիրանց – Բերքաբեր գյուղերի հատվածը, իսկ ադրբեջանական կողմից Բաղանիս- Այրում, Աշաղի- Ասկիպարա- Խեյրիմլի- Կիզիլ Հաջիլի հատվածներում: Միևնույն ժամանակ, Փաշինյանը կոնկրետ պատասխան չէր տվել, թե արդյո՞ք Հայաստանը վերադարձնելու է Բերքաբերի այն հատվածները, որոնք գտնվում են Ադրբեջանի հսկողության ներքո։

Այսօր խորհրդարանական ճեպազրույցների ընթացքում ՔՊ-ական պատգամավորներից հետաքրքրվեցին՝ արդյո՞ք ռիսկային չէ առանց քարտեզների սահմանազատում սկսելը և ի վերջո, արդյո՞ք Հայաստանը կվերադարձնի Բերքաբերի այն հատվածները, որոնք, թեև պատկանում են Հայաստանին, այժմ գտնվում է Ադրբեջանի վերահսկողության տակ։ ՔՊ-ականները, բնականաբար, հոդաբաշխ ոչինչ չասացին՝ չհստակեցնելով, թե արդյո՞ք այդ տարածքները ՀՀ-ին կվերադարձվեն։

«Այն, ինչ գտնվում է ՀՀ միջազգայնորեն ճանաչված սահմաններից ներս՝ ՀՀ-ինն է և որևէ մեկը չի պատրաստվում և չի կարող հանձնել որևէ հողակտոր, ինչը որ դուրս է գտնվում՝ ՀՀ միջազգայնորեն ճանաչված սահմաններից՝ ուրեմն դուրս է գտնվում ՀՀ սահմաններից»,- ասաց ՔՊ-ական պատգամավոր Արթուր Հովհաննիսյանը, ապա, անդրադառնալով չհամաձայնեցված քարտեզներով սահմանազատման գնալուն, մեջբերեց Փաշինյանին, թե քարտեզն ինքնին առաջին տպավորությամբ այն քարտեզը չէ, որ պետք է ինչ-որ թվականի քարտեզ լինի, կան տարբեր քարտեզներ՝ տարբեր իրավական հիմքերով, որոշումներով և այլն, որոնք Ալմա-Աթայի հռչակագրով պետք է դառնան մեր պետական սահմանները։ Ըստ ՔՊ-ականի՝ ռիսկեր գոյություն ունեն միշտ, ռիսկային իրավիճակ է, բայց իրենք իբրև հաշվի են առնում դրանք։ Մյուս ՔՊ-ականը՝ Անդրանիկ Քոչարյանը, ավելացրեց, թե քարտեզների ընտրությունն ամենաբարդ խնդիրն է, որին պետք է հասնել բանակցությունների ընթացքում․ «Կան քարտեզներ, որոնք փոխվում են։ Կարող է՝ գետի հուն փոխվել, սարի հետ կապված խնդիրներ փոխվեն, հանքարդյունաբերությունը փոխում է նաև բնական ներկայություն՝ը թղթի վրա։ Այսինքն՝ քարտզները միշտ փոխվում է»։ Քոչարյանը հայտարարեց, թե շահարկվում է ոչ այնքան քարտեզը, որքան այն, թե ՀՀ-ն իր տարածքն է զիջում․ «Հայաստանը զիջելու ոչինչ չունի։ Հայստանի գործող իշխանությունները շարժվում են պարզ սկզբունքով՝ այն, ինչ մերն է՝ մերն է, բայց դա պետք է արձանագրվի երկկողմանի»։

Աղբյուր` Փաստինֆո