Փաստ ինֆո

Տավուշի մարզում Նիկոլ Փաշինյանի հնչեցրած հայտարարություններ առաջին հերթին վկայում են այն, որ տեղի է ունենում ադրբեջանական նախապայմանները միակողմանի բավարարելու գործընթաց։ ԱԺ-ում տեղի ունեցած ճեպազրույցում ասել է ՀՀ ԱԺ «Հայաստան» խմբակցության ղեկավար, ՀՀ պաշտպանության նախկին նախարար Սեյրան Օհանյանը։

Նրա գնահատմամբ՝ առանց վերջնական համաձայնության և փոխադարձության սկզբունքի պահպանության, հատվածական սահմանազատումն ու սահմանագծումը ամբողջությամբ բխում է Ադրբեջանի շահերից։

«Հատվածական սահմանազատումը հատկապես Տավուշի մարզից սկսելը հանգեցնելու է Հայաստանի Հանրապետության ամենանախապատրաստված առաջնագծի հնարավորությունների նվազեցմանը և այդ հատվածում հավելյալ վտանգներ են առաջանալու, ստեղծվելու սահմանամերձ բնակիչների համար»,- նկատել է պաշտպանության նախկին նախարարը։
Ըստ նրա՝ ռազմավարական նշանակություն ունեցող այդ ճանապարհահատվածի նկատմամբ վերահսկողությունը Ադրբեջանի կողմից բազմապատկելու է ՀՀ անվտանգությանն ուղղված սպառնալիքները։

Մտահոգության համար հիմք է հանդիսանում առաջին հերթին այն, որ սահմանազատման ու սահմանագծման գործընթացի համար նախապայմաններ չկան, ընթացակարգերը խախտվում են։ «Չկա Ադրբեջանի հետ որևէ համաձայնագիր և այդ գործընթացի առաջին կետը սահմանազատումն, է ինչը նշանակում է աշխատել քարտեզների վրա»,- ասել է Սեյրան Օհանյանը՝ արձանագրելով, որ Նիկոլ Փաշինյանը որևիցե քարտեզ չի մատնանշել, որով գործընթացն արվում է։

Փաստացի սահմանազատում չի իրականացվել, ինչի պայմաններում Նիկոլ Փաշինյանն այցելել է ՀՀ Տավուշի մարզ , ժողովրդի մոտ մտահոգություն ստեղծել և ասել , թե իրականում սահմանագծում ենք իրականացնելու։ Սահմանագծումը, ըստ Օհանյանի, նշանակում է տեղում իրականացնել գործընթացը՝ զորքերի հետ քաշել և կահավորել այդ սահմանը։

«Ես կարծում եմ, որ այս ընթացակարգի խախտումը նաև սահմանադրական նորմի խախտում է, դավաճանական պահվածք է սեփական ժողովրդի նկատմամբ և, գտնում եմ, որ այս գործընթացի մեջ ներառված մարդիկ պետք է պատասխանատվություն կրեն»,- նշել է գործիչը եւ կարծիք հայտնել, որ սահմանամերձ համայնքի բնակիչները, ինչպես նաեւ բանակում կլինեն խելացի մարդիկ, որոնք կհրաժարվեն այս անօրինական գործընթացից։

« Երեկ իմ տված հարցին Նիկոլ Փաշինյանը այդպես էլ չպատասխանեց՝ վստա՞հ է , որ ադրբեջանական ստորաբաժանումները մյուս հատվածներից հետ են քաշվելու։ Եթե դու այս ամենն իրականացնում ես միակողմանի, չհասկանալով անվտանգության խնդիրները, հետևությունը մեկն է, որի մասին խոսում ենք այս 3 տարիների ընթացքում, որ իշխանությունները գտնվում են ճնշման, պարտադրանքի ներքո, նրանք արտահայտում են հակառակորդի, տարածաշրջանային նոր խաղացողների շահերը և պետք է հեռանան»,- եզրափակել է Օհանյանը։

Աղբյուր` Փաստինֆո