Փաստ ինֆո

ՌԴ ԱԳՆ պաշտոնական ներկայացուցիչ Մարիա Զախարովան մեկնաբանել է ՆԱՏՕ-ի գլխավոր քարտուղար Յենս Ստոլտենբերգի այցը Հարավային Կավկասի երեք երկրներ՝ Ադրբեջան, Վրաստան և Հայաստան։

«Սա Հարավային Կովկասի հանրապետություններին եվրատլանտյան ազդեցության գոտի ներքաշելու ևս մեկ փորձ է, ես կասեի, փորձի ևս մեկ դրսևորում, որը ձեռնարկվել է ինչպես ՆԱՏՕ-ի կողմից, այնպես էլ անդամ երկրների կողմից առանձին-առանձին երկար ժամանակ և համակարգված», -ասել է Զախարովան այսօր կայացած ճեպազրույցում:

Նրա խոսքով, ՆԱՏՕ-ի նման մակարդակի պաշտոնյայի վերջին այցը հաստատում է, որ այդ ակտիվությունն այս ոլորտում բազմապատկվել է. «Այստեղից էլ ՆԱՏՕ-ի և դրան միացած Եվրամիության շարունակական փորձերը՝ խթանելու տարածաշրջանային պետությունների միջև հարաբերությունների խզումը ինչպես միմյանց, այնպես էլ Մոսկվայի հետ և սրելու իրավիճակը ՌԴ հարավային սահմանների երկայնքով»,- հավելել է նա։

Նրա խոսքով, կա նաև առավելագույն խնդիր, այն է՝ Անդրկովկասում երկրորդ ճակատ բացել Ռուսաստանի Դաշնության դեմ։

«Այդ պայմանավորվածությունները, որոնք ձեռք են բերվել Ռուսաստանի միջնորդությամբ, բառացիորեն որպես կարմիր լաթի գործեցին Արևմուտքի համար, քանի որ դա իրական խաղաղության ճանապարհ էր՝ հիմնված փոխադարձ շահերի վրա»,- կարծում է Զախարովան։

ՌԴ ԱԳՆ ներկայացուցիչը նաև նշել է, որ Արևմուտքի՝ մասանավորապես ՆԱՏՕ-ի ջանքերն ուղղված են Մոսկվայի հետ Երևանի կապերը վարկաբեկելուն և երկկողմ շփումները լիովին սահմանափակելուն, միաժամանակ փորձում են սեպ խրել Բաքվի հետ գործընկերության մեջ։

Զախարովան կարծում է՝ ՆԱՏՕ-ն որպես դաշինք շահագրգռված չէ Հարավային Կովկասում կայունությամբ և անվտանգությամբ։

«Այն, ինչին Վաշինգտոնը և նրա արբանյակները իսկապես հետամուտ են, դա տարածաշրջանի երկրներում հակառուսական տրամադրություն ստեղծելն է, քաոս և լարվածություն մտցնելը, մի բան, որը նրանք գիտեն և սիրում են անել»,- ասել է Զախարովան։

Աղբյուր` Փաստինֆո