Փաստ ինֆո

Ես տավուշցի եմ, բազմաթիվ ընկերներ, հարազատներ ունեմ այնտեղ, երեկ առավոտ ինֆորմացիա ստացա, որ անսպասելի այց է կատարվում Ոսկեպար, վերջին պահին են զգուշացրել այցի մասին, նպատակը բեմականացված շոու սարքելն էր, որ ցույց տան, թե մարդիկ ինչ լավ են ընդունում կապիտուլյանտին։ Այս մասին ԱԺ-ում լրագրողների հետ զրույցում ասաց «Հայաստան» խմբակցության պատգամավոր Գառնիկ Դանիելյանը։

Նա նշեց, որ հանդիպմանը որևէ լրատվամիջոց ներկա չի եղել, դա խոսում է այն մասին, որ գնացել են պատկեր ստանալու, բայց դա նրանց չի հաջողվել, քանի որ բացի բազմաթիվ ՔՊ-ականների, գյուղապետարանի աշխատակիցների, որոնց բերել էին դահլիճը լցնելու ու ֆոն ստեղծելու համար, որ ցույց տան, թե մարդիկ ինչքան գոհ են, որ տարածքներ պետք է հանձնվեն, այնուամենայնիվ, շատերն են եղել, որ գնացել են հանդիպման ու Փաշինյանին հարցրել, թե այդ ինչ տարածքներ ես զիջում։ «Մարդիկ հարցրել են՝ «այդ տարածքների վրա, մեր լեզվով ասած՝ ամագ ունե՞ս, որևէ պատերազմի, որևէ կռվի մասնակցած կա՞ս, արյուն, քրտինք թափած կա՞ս, որ տարածք ես տալիս, թուրքին էլ մոտեցնում են գյուղի բերան»։

Դանիելյանը նշեց, որ այդ տարածքները զիջելու դեպքում ամբողջ երկիրն է աղետների առաջ կանգնելու։ «Դա միջպետական ճանապարհի, կոմունիկացիաների, ՀՀ մտնող գազատարի, 30 տարի կահավորված առաջնագծի հանձնում է, այսինքն, մեր թիկունքը բացվելու է, հյուսիս-արևելյան դարպասները բացվելու են թշնամու առաջ։ Անմիջապես Ադրբեջանի ստորաբաժանումները հայտնվելու են ճանապարհին։

Նիկոլ Փաշինյանը և ՔՊ-ն Ադրբեջանի «յաշմա» և «կոմանդո» ջոկատներին բերում կանգնեցնում են միջպետական ճանապարհի վրա, հաջորդիվ նրանք գյուղի մեջ են գալու կանգնեն։ Այդտեղ ոչ դպրոց, ոչ մանկապարտեզ, ոչ մի պետական հաստատություն չի կարողանալու աշխատել, ուղիղ նշանառության տակ է մնալու։ Էդ մասին նաև այդ հանդիպման ժամանակ փաստել են տեղի գյուղացիները, ասել են՝ թշնամուն բերում՝ հասցնում ես գյուղի մեջ, ի՞նչ անենք՝ խրամատը մեր կուխնիայում փորե՞նք»։

Հարցին, թե արդյոք Փաշինյանը դա չի հասկանում՝ Դանիելյանն ասաց, որ եթե հասարակության կողմից ճնշում լինի՝ Փաշինյանը հետ է կանգնելու իր որոշումներից։

Աղբյուր` Փաստինֆո