Փաստ ինֆո

Գյուղացին կրկին մենակ է իր խնդիրների հետ, անցյալ տարի պահեստներում նեխման է դատապարտվել հազարավոր տոննաներով կաղամբ և կարտոֆիլ։ Այդպես էլ կառավարությունը միջոցներ չձեռնարկեց գյուղմթերքի իրացման խնդիրները լուծելու համար։ ԱԺ ամբիոնից հայտարարել է ԱԺ «Հայաստան» խմբակցության պատգամավոր Արման Ղազարյանը։

Ըստ պատգամավորի՝ խմբակցության անդամների հետ մարզային այցերի ժամանակ բացահայտել են բազմաթիվ գյուղատնտեսական խնդիրներ։ «Ցորենի հավատարմագրված սերմացուի 1 կգ-ի արժեքը, որը ներկրվում է արտերկրից, 190-200 դրամ է։ Որակի առումով որևէ երաշխիք չկա, շատ դեպքերում ցանվում է գարնանացան ցորեն, որը հետո պարզվում է ՝ աշնանացան է»,- նշեց պատգամավորը՝ ավելացնելով որ որակյալը տեղական սերմացուների 1 կգի արժեքի գինը 70-80 դրամ է։ Տարօրինակն այն է, ըստ պատամավորի, որ կառավարության որոշմամբ հաստատվել է այս տարվա գյուղատնտեսական որոշ մշակաբույսերի, այդ թվում հացահատիկի, գարու մշակման համար պետական աջակցության ծրագիր, ինչի համար պարտադիր է հավատարմագրված սերմնացու օգտագործման պահանջը։

«Փաստորեն այս ծրագրով սուբսիդավորումն ամբողջությամբ ուղղվում է դրսից ներկրված սերմացուի և տեղական սերմացուների տարբերության ծախսի վրա։ Այսինքն գյուղացին, ըստ էության, ոչ մի առարկայական օգնություն չի ստանում ՝ ծրագրի շահառու դառնալով։ Հետևանքը՝ սահմանապահ համայնքների մեր հայրենակիցները այս ծրագրի ձևական պահանջների պատճառով , գործնականում չեն կարողանում օգտվել իրենց հասանելի միակ պետական աջակցությունից։ Գյուղացիները հնչեցնում են ծրագրի արդյունավետությունը բարձրացնող բազմաթիվ օբյեկտիվ առաջարկներ, որոնց այդպես էլ ականջալուր չեն լինում օրվա իշխանավորները»,- նշել է պատգամավորը։

Աղբյուր` Փաստինֆո