Փաստ ինֆո

Տավուշի մարզի ընդհանուր իրավասության դատարանում՝ դատավոր Սասուն Մխիթարյանի նախագահությամբ, այսօր շարունակվել է ՀՅԴ ԳՄ անդամ Սուրեն Մանուկյանի և մյուսների գործով դատական նիստը։

Քրեական գործը գտնվում է հիմնական դատալսումների փուլում։ Դատարանն արդեն սահմանել է ապացույցների հետազոտման հաջորդականությունը, ինչի վերաբերյալ այսօրվա նիստում միջնորդություններ ներկայացրեց պաշտպանության կողմը։ Մասնավորապես, Սուրեն Մանուկյանի պաշտպանը նախ միջնորդել է անթույլատրելի ապացույց ճանաչել գործում առկա սքրինշոթերը, որոնց աղբյուրը հայտնի չէ, առկա չէ որևէ տվյալ՝ դրանց ձեռքբերման առնչությամբ, առկա չէ հեռախոսահամար։ Հաջորդիվ՝ Մանուկյանի պաշտպան Ռաֆիկ Մելքոնյանը միջնորդեց՝ դատարանում հարցաքննել տուժող Գրիշա և Խաչատուր Քոքոբելյաններին մինչ գործում առկա փաստաթղթային ապացույցների հետազոտմանն անցնելը։

«Ուսոումնասիրելով փաստաթղթային տեսքով ապացույցները՝ արձանագրեցինք, որ կան ապացույցներ, որոնց արժանահավատ լինելը նախաքննական մարմնի կողմից՝ պատճառաբանվում են այնքանով, որքանով համապատասխանում են տուժող Գրիշա Քոքոբելյանի տված ցուցմունքներին։ Սա նշանակում է, որ եթե ցանկանում ենք հետազոտվող ապացույցի արժանահավատության վերաբերյալ համոզիչ, արդարացի դիրքորոշում կազմենք, ապա նպատակահարմար է նախ հետազոտել այն ապացույցը, որին համապատասխան լինելու պատճառաբանությամբ նախաքննական մարմինն արժանահավատ է դիտել փաստաթղթային տեսքով առանձին ապացույցները»,- ասաց Մելքոնյանը։

Ինչ վերաբերում է Խաչատուր Քոքոբելյանին, ապա վերջինս նախաքննական մարմնին է ներկայացրել առանձին փաստաթղթեր, որոնք գնահատվել են իբրև ապացույց և Խաչատուր Քոքոբելյանին նախապես հարցաքննելը, ըստ պաշտպանի, էական նշանակություն ունեն՝ հետագայում հետազոտվելիք ապացույցի թույլատրելիության, արժանահավատության վերաբերյալ կարծիք կազմելու համար։ Դատարանը մերժեց միջնորդությունը։

Դատարանում քննարկման առարկա դարձվեց նաև տուժող կողմի ներկայացրած քաղհայցը, որով տուժող կողմը պահանջում է Սուրեն Մանուկյանից և մյուսներից հօգուտ Խաչատուր և Գրիշա Քոքոբելյանի՝ բռնագանձել 40,000 ԱՄՆ դոլար։ Պաշտպանության կողմը, մինչդեռ, պնդում է, որ ներկայացված հայցը չի համապատասխանում օրենքի պահանջներին։ Ավելին, տուժող կողմը չի վերացրել քաղհայցի վերաբերյալ դատավորի կողմից ավելի վաղ մատնանշած թերությունները։ Բացի այդ, պաշտպանությունն ուշադրություն հրավիրեց այն հանգամանքին,որ քրեական գործի 15 հատորների մեջ առկա չէ որևէ տվյալ առ այն, որ Խաչատուր Քոքոբելյանն իր ֆինանսական միջոցներից վճարել է ենթադրյալ հանցագործներին, հետևաբար, այս մասով ևս քաղհայցը չի բխում գործի նյութերից։ Դատարանը որոշեց մեղադրյալներ Սուրեն Մանուկյանին, Արմեն Քամալյանին, Թաթուլ Պողոսյանին, Մուրադ Մուրադյանին ճանաչել գույքային պատասխանող, բավարարվեց 40,000 ԱՄՆ դոլարին համարժեք դրամի չափով մեղադրյալների գույքի վրա արգելանք դնելու միջնորդությունը։

Հիշեցնենք, որ Սուրեն Մանուկյանը ձերբակալվել, ապա կալանավորվել է «Ազատ դեմոկրատներ» կուսակցության նախագահ Խաչատուր Քոքոբելյանի հոր առևանգման գործով։ Ընդ որում, ինչպես հետագայում պարզվել է, Սուրեն Մանուկյանը ձերբակալման օրը հրավիրվել էր ՀՀ քննչական կոմիտե մեկ այլ գործով որպես տուժող քննչական գործողության մասնակցելու համար, սակայն ճանապարհին, այսօրվա իրավապահ մարմիններին բնորոշ բեմականացմամբ, բռնության գործադրմամբ ձերբակալվել էր՝ անձի առևանգման կասկածանքով։ Սուրեն Մանուկյանին մեղադրանք է առաջադրվել՝ ՀՀ քրեական օրենսգրքի 191 հոդվածի 2-րդ մասի 5-րդ կետով՝ խմբի կազմում անձի առևանգման հատկանիշներով։ Նախաքննության ընթացքում Մանուկյանի մեղադրանքը լրացվել է, այժմ նրան մեղսագրվում է նաև առանձնապես խոշոր չափերի շորթումը:

Քրեական գործով Սուրեն Մանուկյանից բացի մեղադրյալի կարգավիճակում է ևս երեք անձ։

Հեղինակ՝ Իզաբել Սահակյան

Աղբյուր` Փաստինֆո