Փաստ ինֆո

Արմավիրի մարզի ընդհանուր իրավասության դատարանի դատավորները խուսափում են քննել ԵԿՄ նախկին նախագահ, ԱԺ նախկին պատգամավոր Մանվել Գրիգորյանի եղբորորդու՝ Հրանտ Գրիգորյանի վերաբերյալ 30 տարվա վաղեմության՝ վերաբացված գործը։

Հիշեցնենք, որ 1994թ. Աշտարակի նախկին ժողդատարանի կողմից կայացված դատավճռով Հրանտ Գրիգորյանը մեղավոր էր ճանաչվել 1961 թ ընդունված ՀՀ քրեական օրենսգրքի 259.1-րդ հոդվածի «Բ» կետով՝ զենքի հետ վարվելու կանոնների խախտմամբ Մհեր Պողոսյանին մահ պատճառելու համար և դատապարտվել ազատազրկման՝ 1 տարի ժամկետով։ Դատավճիռը չի բողոքարկվել ու այն մտել է օրինական ուժի մեջ:

24 տարի անց` 2018թ հուլիսի 12-ին, Էդուարդ Պողոսյանը՝ Մհեր Պողոսյանի որդին, հանցագործության մասին հաղորդում է ներկայացրել` պնդելով, թե իր հայրն իրականում սպանության զոհ է դարձել. 1994 թ ապրիլի 16-ին Արմավիրի մարզի Ակնալիճ գյուղի տարածքում գործող ռեստորանային համալիրում վիճաբանության ընթացքում սպանել է Հրանտ Գրիգորյանը, սակայն դեպքի հանգամանքները խեղաթյուրելու արդյունքում Գրիգորյանը դատապարտվել է 1 տարվա ազատազրկման։

Հանցագործության մասին հաղորդման հիման վրա ՀՀ ոստիկանության Վաղարշապատի բաժնում հարուցվել է քրեական գործ՝ պաշտոնատար անձի կողմից անձնական այլ դրդումներով կամ խմբային շահերից ելնելով՝ պաշտոնական փաստաթղթերում ակնհայտ կեղծ տեղեկություններ կամ գրառումներ մտցնելու, կեղծում մտցնելու դեպքի առթիվ, որի նախաքննությունը կատարվել է ՀՀ ՔԿ զինվորական քննչական գլխավոր վարչությունում։ ՀՀ զինվորական կենտրոնական դատախազության զինվորական ծառայության դեմ ուղղված հատկապես կարևոր գործերով քննության նկատմամբ հսկողության բաժնի դատախազ Վ. Հարությունյանի որոշմամբ հարուցվել է վարույթ՝ նոր իհայտ եկած հանգամանքների հիման վրա։

2019թ փետրվարի 20-ին ՀՀ զինվորական դատախազ, ՀՀ գլխավոր դատախազի տեղակալ Վ. Հարությունյանի որոշմամբ վերաքննիչ բողոք է ներկայացվել՝ դատավճիռը նոր ի հայտ եկած հանգամանքների հիման վրա վերանայելու համար։ Վերաքննիչ քրեական դատարանը որոշել է քրեական գործն ուղարկել Առաջին ատյանի դատարան` նոր դատաքննության:
Վերաքննիչ դատարանի որոշման դեմ պաշտպանության կողմը բողոք էր մեչլակացրել՝ պնդելով, որ չկա որեւէ նոր երեւան եկած հանգամանք ու նոր դատաքննություն սկսվելու դեպքում այն պարզապես կկարճվի:

Քրեական գործն, այդուհանդերձ, ուղարկվել է դատարան։ Արմավիրի մարզի ընդհանուր իրավասության դատարանը 2021թ․ գործի՝ նախապատրաստական փուլում որոշում է կայացրել՝ վաղեմության ժամկետներն անցած լինելու հիմքով քրեական գործի վարույթը կարճելու մասին։ Դատախազությունը վերաքննիչ բողոքով վիճարկել է քրեական գործի կարճման որոշումը, ինչը բավարարվել է, իսկ պաշտպանության կողմի վճռաբեկ բողոքը թողնվել է առանց քննության և, ըստ այդմ, քրեական գործը կրկին ուղարկվել է առաջին ատյանի դատարան՝ նոր քննության։

Գործը բեկանումից հետո առաջին ատյանի դատարանում գտնվում է 2022թ․ դեկտեմբեր ամսից, սակայն գործով քննություն, որպես այդպիսին, տեղի չի ունեցել։ Դատավորները, որոնց մակագրվում է քրեական գործը, խուսափում են քննել այն՝ մեկը մյուսին հերթ չտալով՝ ինքնաբացարկներ հայտնելով։ Գործը 2022թ․ դեկտեմբերի 27-ին մակագրվել է Արմավիրի մարզի ընդհանուր իրավասության դատարանի դատավոր Էդգար Մանասյանին, որի նախագահությամբ կայացել է դատական 5 նիստ, սակայն դատավորը 2023թ․ հունիսի 14-ին ինքնաբացարկ է հայտնել՝ պաշտպանի միջնորդության հիման վրա։ Խնդիրն այն է, որ դատավորը նախկինում աշխատել է զինվորական դատախազությունում, ունի ընկերական հարաբերություններ դատախազ Վահան Հարությունյանի հետ։ 2023թ․ հունիսի 16-ին գործը վերամակագրվել է դատավոր Մակար Կիրակոսյանին, որը ևս ինքնաբացարկ է հայտնել՝ հիմքում դնելով այն հանգամանքը, որ դատավոր Նաիրա Գրիգորյանի հետ աշխատում է նույն դատարանում՝ նույն նստավայրում, իսկ վերջինս սույն գործով մեղադրյալի հետ ազգակցական կապ ունի։ 2023թ, հուլիսի 27-ին քրեական գործը վերամակագրվել է դատավոր Հրաչյա Մեխակյանին, որը ևս ինքնաբացարկ է հայտնել՝ դատավոր Նաիրա Գրիգորյանի հետ ունեցած ընկերական հարաբերություններ ունենալու հիմքով։ Հաջորդիվ գործը մակագրվել է դատավոր Հակոբ Մանուկյանին, որը, ի սկզբանե, կարճել էր գործի վարույթը՝ արձանագրելով, որ անցել են քրեական պատասխանատվության ենթարկելու համար վաղեմության ժամկետները, ուստի, դատավոր Մանուկյանը ևս ինքնաբացարկ է հայտնել։

Քրեական վարույթը 2024թ․ մարտի 5-ին վերամակագրվել է Արմավիրի մարզի ընդհանուր իրավասության դատարանի դատավոր Կարինե Դավթյանին։ Առ այս պահն առկա չէ տեղեկություն՝ քրեական գործը վարույթ ընդունելու մասին։

Հեղինակ՝ Իզաբել Սահակյան

Աղբյուր` Փաստինֆո