Փաստ ինֆո

Մենք քննարկել ենք Հարավային Կովկասում կայունության ապահովումը, ինչը կարևոր է Եվրաատլանտյան անվտանգության համար, քանի որ կանգնած ենք ավելի վտանգավոր աշխարհի առջև։ Այս մասին Հայաստանում հայտարարել է ՆԱՏՕ-ի գլխավոր քարտուղար Յենս Ստոլտենբերգը՝ բարձր գնահատելով Փաշինյանի՝ խաղաղության և ժողովրդավարության արժեքներին նվիրվածությունը։

«Այսօր Հայաստանն ու Ադրբեջանը հնարավորություն ունեն տևական խաղաղության հասնել տարիների հակամարտությունից հետո։ Ահա թե ինչու եմ ես երկրներին կոչ անում հասնել համաձայնության, որը կհարթի հարաբերությունները և ձեր ժողովրդի համար տևական խաղաղություն կների։

ՆԱՏՕ-ն աջակցում է Հայաստանի ինքնիշխանությանը, տարածքային ամբողջականությանը և խաղաղ ձգտումներին։ Սակայն Ռուսաստանի պատերազմը սթափեցնող ուղերձ է, որ չենք կարող չգնահատել խաղաղությունը։ Ես ողջունում եմ ձեր համերաշխությունն Ուկրաինայի հետ և բոլոր գործընկերներին կոչ անում անել ամեն ինչ, որպեսզի Պուտինը չհաղթի իր սանձազերծած պատերազմում»,- Երեւանում ասել է ՆԱՏՕ-ի գլխավոր քարտուղարը։

Ներկայացնելով հակամարտության ընթացքը ռուս-ուկրաինական ճակատում՝ նա նշեց, որ իրավիճակը շարունակում է ծանր մնալ, ուստիեւ պետք է ավելացնել, ոչ թե նվազեցնել աջակցությունը։ «Եթե Պուտինը Ուկրաինայում հաջողության հասնի՝ վտանգ կա, որ նրա ագրեսիան այդտեղ կանգ չի առնի և ավտորիտար այլ սուբյեկտները կոգեշնչվեն դրանով»,- ասել է նա։
Ստոլտենբերգի հայատնեց, որ Նիկոլ Փաշինյանի հետ հանդիպմանը խոսել են նաեւ Հայաստանի ներքին բարեփոխումների մասին և ողջունել այն փաստը, որ Հայաստանը աշխատում է ՀՀ զինված ուժերում ժողովրդավարության վերահսկողությունն ամրապնդելու ուղղությամբ, այդ թվում նաև ՆԱՏՕ-ի բարեվարքության ամրապնդման ծրագրին մասնակցության միջոցով։ «Իրական քայլեր են ձեռնարկվել կոռուպցիայի դեմ պայքարի հարցում, ժողովրդավարական ինստիտուտներն ուժեղացանելու և իրավունքի գերիշխանությունը պահպանելու հարցում»։

Նա նաև ընդգծեց, որ կշարունակեն ուժեղացնել գործընկերությունը միասին աշխատելով ավելի մեծ խաղաղության կայունության և բարեկեցության համար՝ Հարավային Կովկասում և տարածաշրջանում։

Աղբյուր` Փաստինֆո