Փաստ ինֆո

Հայաստանի հնարավոր դուրս գալը ՀԱՊԿ-ից պետք է հենվի երկրի իրական կարիքների և ոչ թե Արևմուտքի «խաղերի» վրա, և այս որոշումը չի վերաբերում երկրի իրական ազգային շահերին։ Այս մասին «Ռիա Նովոստի»-ի հետ զրույցում ասել է ՌԴ ԱԳՆ մամուլի քարտուղար Մարիա Զախարովան։

Նրա խոսքով՝ յուրաքանչյուր երկիր ազատ է ընտրելու, թե ինչ միավորումների հետ է ցանկանում հարաբերություններ զարգացնել՝ կախված կոնկրետ պատճառներից և գործոններից։ Զախարովան նշել է, որ դա պետք է անել իրականության, երկրի իրական կարիքների վրա հենվելով, այլ ոչ թե՝ «խաղարկել», տրվել որևէ գայթակղության, «արրմտյան սցենարով հերթական բեմականացմանը»։ Ըստ Զախարովայի՝ իրեն հայտնի չէ, թե ինչու են քաղաքական գործիչները Երևանում Հայաստանի քաղաքացիներին պարտադրում կարծիք՝ ՀԱՊԿ բացասական դերի մասին։ Նրա կարծիքով՝ դա չի վերաբերում Հայաստանի իրական և ազգային շահերին։

«Ես կարծում եմ և վստահ եմ, ունեմ նման տեղեկություն։ Դա այն է, ինչը նախապատրաստվել է ինչ-որ տեղ՝ Բրյուսելում․ հենց այն տեղեկատվական կերը, որով այժմ փորձում են առատորեն կերակրել ՀՀ քաղաքացիներին՝ ինչ-որ գոյություն չունեցող բաներ հորինելով ՀԱՊԿ-ի մասին»,- նշել է Զախարովան՝ հավելելով, որ վստահաբար որևէ մեկին ոչ մի վատ բան չի լինի ՀԱՊԿ-ից։

Զախարովան նշել է, որ արդյունքում որոշումը Երևանինն է լինելու, բայց չարժե դա անել՝ «գոյություն չունեցող» փաստերի հիման վրա։

Աղբյուր` Փաստինֆո