Փաստ ինֆո

Քաղաքային իշխանությունը դժոխքի է վերածել Լենինգրադյան 23/11, 23/13, 23/12 շենքերի բնակիչների կյանքը։

Ավելի վաղ առիթ ունեցել ենք նշելու, որ ճանապարհին հարող փոքր տարածքում քաղաքային իշխանությունը կանաչապատում անելու փոխարեն թույլատրել է կառուցապատում իրականացնել ու 6 հարկանի բնակելի շենք է կառուցվում՝ անմիջապես ճամփեզրին, ավելի ճիշտ ճանապարհի հաշվին։

Դեռեւս 2021 թվականին բնակիչներն ահազանգում էին, որ շինարարություն է սկսվել, ձողեր են տեղադրվել ճանապարհի վրա, անգամ Լենինգրադյան 23/11 շենքի բակ տանող ասֆալտապատ տարածքն են փորել՝ ասելով, թե իրենց սեփականությունն է։ Բնակիչները զրկվել են ոչ միայն անվտանգ երթևեկելու հնարավորությունից, այլ նաեւ՝ քայլելու, քանի որ դեպի կանգառ տանող ճանապարհ այլեւս չկա անգամ արահետ՝ հետիոտնի համար նախատեսված։

Պարզվեց քաղաքապետարանը թույլ է տվել այդ հասցեում բազմաբնակարան շենք կառուցելու՝ 5 վերգետնյա հարկով և մեկ մանսարդային հարկով: Կառուցապատողը ֆիզիկական անձինք են՝ Նորայր Գալստյան և Կարինե Սարգսյան։ 2021 թվականին Երեւանի քաղաքապետարանից հայտնել էին, թե երկու տարվա ընթացքում պետք է ավարտեն շինարարությունը։ Ավելին, պնդել թե մինչև շինարարության մեկնարկը կառուցապատողը պարտավոր է ապահովել շինհրապարակի կազմակերպման համար անհրաժեշտ և գործող օրենսդրությամբ նախատեսված պայմանը, որը ենթադրում է նաև գիշերային լապտերներով կահավորված հետիոտնային ժամանակավոր անցում: Չապահովելու պարագայում կձեռնարկվեն վարչական պատասխանատվության միջոցներ:

Այս պատասխանից անցել է երեք տարի, իսկ շինարարությունը ոչ միայն չի ավարտվել, այլ վերջն էլ չի երեւում, իսկ հետիոտնի համար ճանապարհի մասին խոսելն ուղղակի ավելորդ է՝ մարդիկ կամ պետք է շինանյութերի վաճառքի տարածքով անցնեն կամ էլ մեքենաների միջով։ Թեեւ անգամ մեքենաների համար երթեւեելու տեղ չկա. օրվա տարբեր ժամերին այստեղ խցանումներ են։

Տարածքում չկան անհրաժեշտ ենթակառուցվածքներ ու այստեղ տարին կլոր՝ տարբեր փոսեր են գոյանում մեկ ջրատար, մեկ գազատար կառուցելու համար. իսկ փոսերը հանգեցնում են վթարների, մեքենաների վնասման, որի համար ոչ քաղաքապետարանն է փոխհատուցում, ոչ էլ կառուցապատողը։ Իսկ փոշու մասին խոսելն ուղղակի ավելորդ է՝ այստեղ բնակիչները օդ չեն շնչում, այլ փոշի։

Երեւանի քաղաքապետ Ավինյանը դեռ խոսում է քաղաքը բնակչի համար հարմարավետ դարձնելու մասին, առայժմ՝ այս տարածքի բնակիչների կյանքը վերջին տարիներին դժոխքի են վերածել, իսկ արտաքին տեսքի մասին խոսելն ուղղակի անիմաստ է, քանզի շենքի կառուցմամբ, որով հնարավորություն է տրվել ինչ-որ խումբ մարդկանց ուղղակի փող աշխատել, խաթարվել է ոչ միայն բնակիչների բնականոն կյանքը, այլ նաեւ թաղամասի արտաքին տեսքը։

Շենքի բնակիչներն ահազանգում են՝ մեր հարկերի հաշվին կյանքը դարձնում են դժբախտ ու դժգույն։

Աղբյուր` Փաստինֆո