Փաստ ինֆո

Արագածոտնի որոշ դպրոցներում արգելվել է 44-օրյա պատերազմում զոհված զինծառայողների ծնողների մուտքը՝ դպրոցներ։ Այդ մասին այսօր բարձրաձայնեցին ծնողները՝ ներկայացնելով որոշ մանրամասներ։

«Որդիների կանչ» հասարակական կազմակերպության անդամ Արա Ռոստոմյանը նշեց, որ այցելել են տարբեր մարզեր՝ տեսնելու «Փառքի անկյուններ»-ը հանվել են, թե ոչ։ Արագածոտնում նրան դիմավորել են մեղմ ասած դժկամությամբ, եթե չասենք թշնամաբար։ 4 կրթական հաստատությունից երեքում թույլ չեն տվել մուտք գործել։ Երբ ծնողներն ասել են, որ եկել են տեսնելու, թե արդյոք Փառքի անկյունները պահպանված են՝ խոչընդոտողներից մեկն ասել է, թե իրենք եւս կռված տղաներ են։
«Եթե կռվել եք, ուրեմն դուք մեր տղաների հետ եք կռվել։ Եթե մեր տղաների հետ եք կռվել, տեսել եք մեր տղաների նահատակությունը, ապա դուք ինչո՞ւ չեք թողնում ձեր ընկերների ծնողները գնան, իրենց երեխաների նկարները տեսնեն»,- ասել են ծնողները։

Ծաղկահովիտ համայնքում կրթական հաստատության տնօրենը կես բերան հաստատել է, որ իրենց ներս չթողնելու ցուցում կա։ Ագրեսիվ են դիմավորել նաեւ Ափնայում «Լրագրողներից մեկը հանեց հեռախոսը, որ նկարի, միանգամից հարձակվեցին էդ աղջկա վրա, թե մարդու իրավունքների խախտում է»,- պgտմեցին ծնողները՝ նշելով, որ տնօրենն ասել է, որ իրավունք չունեն ներս մտնել։ Եւ միայն շատ համոզելուց հետո ասել է, որ նկուղում մի դասասենյակ ունեն, այնտեղ են տեղափոխել նկարները։

Զոհված զինծառայող Հակոբ Ռոստոմյանի հոր՝ Արա Ռոստոմյանի փոխանցմամբ՝ մի շարք այլ մարզերում իրենց լավ են ընդունել, ներս են հրավիրել , թույլատրել նկարահանումները ու անգամ զարմացել այդ դպրոցներում նման վերաբերմունքի համար։

Հիշեցնենք, որ ԿԳՄՍ նախարար Ժաննա Անդրեասյանը երաշխավորել էր, որ «Փառքի անկյունները» հեռացնելու ցուցում չկա ու խոստացել հետամուտ լինեն նման ահազանգերի դեպքում։

Հուսանք՝ ծնողների վկայակոչած դեպքերն իսկապես ԿԳՄՍ-ում քննարկման առարկա կդառնան։

Աղբյուր` Փաստինֆո